Үөһээ Бүлүүгэ «Оҕоҕо соһуччу үөрүүнү бэлэхтиэх» диэн ааттаах Саҥа Дьыллааҕы акцияны улуус дьаһалтатын иһинэн үлэлиир сокуоннай саастарын туола илик оҕолор дьыалаларын көрөр хамыыһыйа тэрийдэ. Акция чэрчитинэн уопсайа 40 соһуччу үөрүүнү бэлэхтээбиттэр.
Бу туһунан хамыыһыйа эппиэттээх үлэһитэ Надежда Кардашевская кэпсээтэ: — Улуус дьаһалтатын иһинэн үлэлиир отделлар, салайааччылар, предпринимателлэр, КДН хамыыһыйатын чилиэннэрэ кыттыыны ылбыттара. Ол курдук, муниципальнай сулууспа бэтэрээннэрэ, «Берег» маҕаһыын, дьарыктаах буолуу киинэ, «Үрүйэчээн» оҕо саада, бэкээринэлээх ИП Раиса Степанова уо.д.а. оҕолорго минньигэс бэлэхтэри, оонньуурдары, сорохторун анабыл аадырыстаан туттарбыттара. Маныаха хамыыһыйа үлэһиттэрэ уонна улуустааҕы дьиэ кэргэн отдела Тымныы оҕонньор, Хаарчаана арыаллаах бэлэхтэри ыалларынан сылдьан эҕэрдэлээн туран туттарбыппыт ураты, сонун үөрүүнэн буолла. Элбэх оҕолоох ыаллар уонна хамыыһыйа көрүүтүгэр-истиитигэр сылдьар оҕолор улаханнык долгуйдулар, махтаннылар. Бу быйыл бастакы саҕалааһыммыт. Аны саҥа сылга уонна эһиилги Саҥа дьылы көрсө өссө киэҥ хабааннаах ыытыахпыт диэн эрэллээхпит.
Бу акцияны өйөөн, «Хотун Бүлүү» медиа үлэһиттэрэ сыл устата ханнык баҕарар киинэҕэ талан сылдьар быраабы биэрэр биэс сертификаты оҕо дьиэтин иитиллээччилэригэр анаан, эмиэ бэйэтин соһуччу бэлэҕин оҥорбуттара.