Оройуон салалтатын күннээҕи үлэтэ кыстык уустук боппуруостарынан дьарыктаныыттан саҕаламмыта үһүс ыйын түмүктээтэ.
Ахсынньы 6-8 күннэригэр Дьокуускайтан кэлбит самолетунан 8 тн. сылгы, убаһа этэ барыахтааҕа этилиннэ. Ол гынан баран, хомойуох иһин, бу күннээҕи чахчынан Белай Горатааҕы ыскылаакка 2 тн. 919 кг. эрэ эт баар. Суол суоҕунан, Абыйтан ураты нэһилиэктэртэн эт манна кэлиитэ харгыстанар. «Якутопторг» АХ социальнай суолталаах ас-үөл ахсынньы 7-8 күннэригэр вертолетунан Муҥурдаах уонна Майыар нэһилиэктэригэр тиэрдиллиэхтээх. Көтөр аал төннөрүгэр муҥурдаахтартан 700 кг., майыардартан 2,5 тн. эти тиэниэхтээх. Белай Гораттан бу эт, дуогабар быһыытынан, «Сахаагропродукт» барыаҕа. Быһаардахха, туттарыллар эт ветеринарнай ирдэбиллэринэн ыспыраапкалаах буолуохтаах. Ону баара, бу докумуону толоруу 5 хас күнү ыларынан хаһаайыстыбалар сып-сап түргэнник хамсаналлара ирдэнэр. Иһитиннэриллибитинэн, тыа хаһаайыстыбатын управлениета олохтоох баһаарынай чаастыын кэпсэтэн 10-ча куруусчуту хайы-сах булбут, А.Ю. Жирков «Камаз» массыыната үлэлиэхтээх.
Дизельнай оттукка оройуон «Саханефтегазсбыт» АУо дуогабардаах. Маҥнайгы дуогабарга кини биэрэр оттугун 20 тн. кээмэйдээбит, иккис дуогабарыгар көннөрөн лиитэрэнэн таһаарбыт. Онон араастаһыы кээмэй кыччааһыныгар тиэрдибит.
Сылгылар ырыганныылларынан эбии аһатыы наадата эмиэ өйдөнөр. Манан сибээстээн, сылгылар туруктара бөҕөргүүрүгэр «Сахабактисубтил» диэн саҥа көлүөнэ сүөһү аһылыгар, минераллаах эбилик 150 единица ылыллыбыт. Кини төһө туһалыырыттан көрөн үүнэр сылга бу ахсааны улаатыннарыахха сөп диэн эттилэр.
Тааттан 100 төбө, Мэҥэ-Халаҥастан – 50, Чурапчыттан — 100 уонна Амматтан — 50 төбө сылгы кэлиэхтээҕэ бэлиэтэннэ. Маныаха хаһаайыстыбалартан сайаапкалары хомуйуу туһунан биллэриллибитэ быданнаабыт. Ол эрээри, мэлдьи буоларын курдук, бытаарыы син-биир баар дииллэр. Бүгүҥҥү туругунан 48 эрэ сайаапка киллэриллибит. Онон сылгы баайдаахтар сайаапка суруйарга ыксыыллара уонна олус дьүдэйбит сылгылары тута сыыйаллара наада. Аны туран, кэлиэхтээх сылгыларга 50% субсидия көрүллэр. Холобур, убаһа 2016 сыллаах төрүөх 25 тыһ. солк., тый 2015 с.т. 32,5 тыһ. солк. тэҥнэһиэхтэрэ. Манна даҕатан эттэххэ, сылгылар манна аҕалыллалларыгар 5 тн. оттоох, 80 кг. зернофуражтаах буолаллара чуолкайдаммыт.