Абыйга сүөһү сиир отун бураанынан тиэйэллэр

98

Абый улууһун Муҥурдаах нэһилиэгэр ыйтан ордук кэм устата буурҕа быыһыгар олордулар. Ити эрээри кыстык үлэтэ тохтообот.


Абыйга хаар, буурҕа балаҕан ыйын 27 күнүттэн саҕаламмыт. Кырдьаҕастар этэллэринэн, хаһан даҕаны маннык күн-дьыл тура илигэ. Сүөһүлэрин аһатаары олохтоохтор отторун “буранынан” тиэйэ олороллор. Манна “бурантан” атын тиэхиньикэ сылдьар кыаҕа суох. Сылгылар ыраахтан кыайан кэлбэккэ тураллар. “Хаар анна ибис-ириэнэх сытар. Суолу-ииһи барытын, дьиэ кырыыһатын кытта тэбис-тэҥ тибии типпит. Абый улууһугар барытыгар курдук, манна эмиэ суһал штаб тэрилиннэ”, — диэн нэһилиэк баһылыга О.П. Корякин иһитиннэрэр.

Төһө да уустук балаһыанньа олохтоммутун үрдүнэн, Муҥурдаахха хочуолунайга олунньу ыйга тиийэр таас чохторо баар. ДЭС уматыга эмиэ бэлэм. Бэкээринэҕэ бурдуктара кулун тутар ыйга тиийэр гына тиэллэн турар эрээри, кууһунан атыыга бурдук бүппүт.

Буурҕа тохтоотоҕуна нэһилиэк олохтоохторо, тэрилтэлэр үлэһиттэрэ бары хаары ыраастааһыҥҥа субуотунньукка тахсарга бэлэмнэр.

Айылҕа уустук усулуобуйатын түмүгэр ыарахан балаһыанньаҕа киирбит Абый улууһугар дьон көмөлөһөр баҕалаахтар. Ол курдук, өрөспүүбүлүкэҕэ бастакынан Мэҥэ Хаҥалас улууһун бааһынай фермерскэй хаһаайыстыбалара абыйдарга көмөлөһөр туһунан быһаарыннылар. Хорообуттан “Хорообут” ХЭУо салайааччыта Прокопий Плотников, Томтортон Григорий Васильев, Табаҕаттан Поликарп Васильев отунан, Төхтүртэн Аркадий Попов бурдугунан көмөлөһүөхтэрэ. “Кыстыкка маннык ыарахан балаһыанньаҕа түбэспит улууска төһө кыалларынан атын улуустар, хаһаайыстыбалар көмөлөһүөхтэрин наада. Мин хаһаайыстыбам 30 т оту биэрэргэ суоттанан олорор. Тиэйиитигэр СӨ Тыа хаһаайыстыбатын министиэристибэтэ көмөлөһөр ини диэн эрэнэбит”, — диэтэ Прокопий Романович.