Алдан улууһугар Сылгылыыр үрэх үөһэ тардыытыгар эһэ арҕаҕыттан тэскилээн, мэнээктии сылдьарын туһунан СӨ Айылҕа харыстабылын министиэристибэтигэр иһитиннэрбиттэр.
Бу түбэҕэ 40 булчут уонна көс олохтоох «Кырбыкан», «Гонам» табаһыттар ыстаадалара бултууллар-алтыыллар.
Тыатааҕы федеральнай суолталаах Өлүөнэ суолга тахсан, Үөһээ Амма сэлиэнньэтин аттыгар ордууламмыт. Кыһын мэнээхтээбит адьырҕа олус кутталлаах. СӨ Айылҕа харыстабылын министиэристибэтигэр биологическай ресурсаларга уонна ураты харыстанар сирдэр дирекциятыттан суһал инспекция исписэлиистэрэ тиийэн, сэтинньи 14 күнүгэр Үөһээ Амматтан 20 км сиргэ адьырҕа кыылы бултаабыттар.
Этин-сиинин көрүү-истии кэнниттэн саа буулдьатыттан бааһыран баран арҕаҕар киирбит диэн быһаарбыттар. Ол оспотоҕуттан сылтаан арҕаҕыттан тахсарга күһэллибит. Суолун ирдээн көрбүттэрэ тыатааҕы Буотама үрэх үөһэ тардыытын түбэлэринэн элбэхтик сылдьыбыт эбит.