Ыам ыйа элбэх үтүө бырааһынньыктаах дьыл кэмэ. Сахалыынан Иэйэхсит ыйа.
Биир оннук кэрэхсэбиллээх бэлиэ даатаҕа, Мусуойдар аан дойдутааҕы күннэригэр, Кутанаҕа Б.Н.Андреевка аналлаах мемориальнай дуосканы арыйыы үөрүүлээх сиэрэ-туома буолан ааста. Өйдөбүнньүк дуосканы Борис Николаевич кыргыттара, Элгээйитээҕи региональнай экологическай киин үлэһиттэрэ Галина Борисовна уонна Светлана Борисовна кини төрөөбүт, үөрэммит дьиэтигэр, билигин Күндэ мусуой дьиэтэ буолан турар эбийиэк истиэнэтигэр ыйаатылар.
Мемориальнай дуосканы биир дойдулаахпыт, биллиилээх скульптор, Ю.А.Гагарин ийэтин пааматынньыгын оҥорбут, хомойуох иһин, билигин биһиги кэккэбитигэр суох Эдуард Иннокентьевич Пахомов оҥорбут.
1920 сыллаахха Кутана улуус киинэ эрдэҕинэ маҥнайгы кыраайы үөрэтэр мусуойу Петров Михаил Николаевич аһан үлэлэппитэ. Экспонаттары барытын бэйэтэ хомуйбута. 1936 сыллаахха Сиэйэҕэ үлэлии барарыгар оскуола устуоруйатын мунньан хаалларбыта. Онно оло±уран Кутана оскуолатын иһинэн 1938 сыллаахха маҥнайгы кыраайы үөрэтэр муннук тэриллибитэ. Өссө М.Н.Петров Кутанаҕа үлэлии сылдьан маҥнайгы пионерскай тэрилтэни тэрийбитэ. Ону таһынан нэһилиэктэн чугас сиргэ бурдук ыһан, оҕуруот аһын олордон оҕолор итии аһылыктарын тэрийбитэ. Ол туһунан «Бэлэм буол» хаһыакка суруйбуттара баар. Инньэ гынан, кини улууспутугар аан бастакынан эдэр көлүөнэ дьону патриотическай тыыҥҥа ииппитэ.