Культура уонна искусство Артикатааҕы государственнай института Саха Өрөспүүбүлүкэтин үүнэр көлүөнэтин сыаллаах Фондатын үбүлээһининэн «Путь в искусство» бырайыагын үлэлэтэр. Бу бырайыак чэрчитинэн Арктика эргимтэтигэр сытар оройуоннарга культура, искусство эйгэтигэр талааннаах, дьоҕурдаах оҕолору таба көрөн таһаарааһын, үөрэххэ ылан идэ биэрээһин буолар.
Институт культураҕа, искусствоҕа деятеллэрэ, сүрүн специалистара оройуоннарга сылдьан маастар-кылаастары биэриэхтээхтэр. Биһиги оройуоммутугар бу күннэргэ АГИКИ библиотекатын отделын сэбиэдиссэйэ Саввинова Екатерина Владимировна кэлэн Өлөөн, Харыйалаах орто оскуолаларын 9-11 кылаас үөрэнээччилэрин, учууталларын уонна Оҕону эбии үөрэхтээһин киинин педагогтарын, иитиллээччилэрин кытта көрсөн АГИКИ үөрэҕин кыһатын кытта сиһилии билиһиннэрдэ, үөрэнэ кэлэргэ ыҥырда.
Оройуон кииннэммит библиотекатыгар сылдьан «Библиотека в формировании информационной культуры личности школьников» диэн тиэмэҕэ библиотека үлэһиттэригэр маастар-кылаас ыытан баран түмүгэр сертификат туттарда. Арктикааҕы аҕыйах ахсааннаах норуоттарын үйэттэн үйэҕэ илдьэ кэлбит култуураларын үйэтитэр уонна сайыннарар үтүө миссиялаах институкка күнүскү уонна кэтэхтэн үөрэххэ устудьуоннары ыҥырар.
Екатерина Владимировна үрдүкү кылаас үөрэнээччилэрэ бу үөрэхтэри интириэһиргээбиттэрин, стипендияны, уопсайга олорор усулуобуйаны, иллэҥ кэмнэригэр тугунан дьарыктаныахтарын сөбүн о.д.а тустарынан ыйыппыттарын эттэ. «Эһиги хотугу дойдугутугар мин аан бастаан сылдьабын уонна тута ураты айылҕатын, дьоно-сэргэтэ үөрүнньэҥнэрин, элэккэйдэрин биһирээн көрдүм. Биһиги институппутугар ордук библиотека салаатын бүтэрэн үлэлии сылдьаллар. Ити эрэн кэнники кэмҥэ Өлөөнтөн олох аҕыйах оҕо туттарсар буолла. Баай духуобунай култуураҕытын, эбэҥки норуотун үйэтитэр, сайыннарар эдэр каадыры үүннэрэр сыаллаах эдэр ыччаккытын кытаатан үөрэтэ ыытын, кэтэһэбит. Кэлбит сыалбын ситтим, оробуочай сырыыбыттан астынным. Культура управлениетын начальнигар Н.П. Николаеваҕа, кииннэммит библиотека сэбиэдиссэйигэр Н.Н. Семеноваҕа махтанабын», — диэн бэйэтин санаатын үллэһиннэ.
