Онус төгүлүн ыытыллыбыт өрөспүүбүлүкэ бырабыыталыстыбатын бэрэссэдээтэлин бирииһин иһин ат сүүрдүүтүгэр 10 км дистанцияҕа Үөһээ Бүлүү улууһун ата, 9 саастаах Астык сүүрэн, кимиэхэ да иннин биэрбэтэ. Улууспут хамаандата кыайыылаах буолан, 500 тыһыынча солкуобай суумалаах сертификаты бэлэх тутта.
Бу кыайыыга быһаччы сыһыаннаах, хамаанда ис-тас туругун, тутулун толору билэр киһинэн Үөһээ Бүлүү улууһугар ат спордун федерациятын толорооччу дириэктэрэ Андрей Неустроев буолар. Кини тренердэр, уопсай дьарык уонна Астык кыайыытын туһунан маннык кэпсээтэ: «Астык бу иккис кыайыыта буолар. 2014 сыллаахха иккис кэлбитэ, онтон 2015 сылга эмиэ 10 км. уһуҥҥа бастаан турар. Үөһээ Бүлүү сүүрүк ааттарын сүрүн тренеринэн Анжелика Гаврильевна Неустроева буолар. Астыгы Хаҥалас киһитэ Илья Андреевич Яндреев дьарыктыыр. Астык олус кытаанах майгылаах, бэйэтэ ураты характердаах сылгы. Манчаары оонньууларын сүүрдүүтүгэр характерын көрдөрөн, саамай быһаарыылаах сүүрдүүттэн туораан хаалбыта, инньэ гынан Үөһээ Бүлүү хамаандата уопсай түмүккэ 4-с миэстэ буолбута. Бу кыайтарыытын куоракка кэлэн ситиһиннэрдэ диэххэ наада. Саамай уһун дистанцияҕа тахсан баран, хара бастакыттан инники сылдьыбыта. Нам, Амма аттара эккирэппиттэрэ даҕаны, иннин отой биэрбэтэ. Онон үөрүүбүт муҥура суох. Быйылгыттан ыла үөһээ бүлүүлэр баарбытын биллэрдибит».
Атырдьах ыйын 18 күнүгэр Лээги кубога буолаары турар. Биһиги улууспут аатыттан 2400 м. Корибиан Бой уонна Белмэн сүүрүөхтэрэ. Манна бириис фондатыгар 2 мөлүйүөн солкуобай турар. Хас биирдии кыттааччы взнос быһыытынан 50-нуу тыһ. солк. угар. Оттон 3200 м. дистанцияҕа Саха сиригэр төрөөбүт сылгылар сүүрүөхтэрэ. Манна, балаһыанньа быһыытынан, взноска 1-дии убаһа бэриллэр. Үөһээ Бүлүү улууһун чиэһин Голден Граф уонна Архангел көмүскүөхтэрэ. Голден Граф быйылгы бырабыыталыстыба бирииһин кыайыылааҕа, оттон Архангел өрөспүүбүлүкэ Дербитин иккис призера буолаллар.
Андрей Неустроев кэпсэтиитинэн Краснодарскай кыраайтан Алексей Сторчеус диэн биллэр жокей кэргэнинээн кэлэн, ыам ыйыттан биһиги улууспут аттарын дьарыктааһыҥҥа үлэлэһэ сылдьаллар. Маны таһынан быйылгы дьылга Краснодарскай кыраайтан икки саҥа ат: Анна Болейн – 4 саастаах биэ уонна үстээх атыыр – Белмэн кэлэн хамаанда биллэ сэргэхсийдэ диэн Андрей Иннокентьевич санаатын үллэһиннэ.
Аттары аҕалыыга күүс-көмө буолбут улууспут биир бөдөҥ урбаанньытыгар Семен Тумусовка итиэннэ ат спордун өйүүр, сэҥээрэр дьоҥҥо, аттар дьарыктаналларыгар көмө, өйөбүл буолар улуус дьаһалтатыгар, спорт управлениетыгар федерация аатыттан улахан махталын тириэрдэр. Ат спорда Үөһээ Бүлүүгэ сайдан эрэрин бэлиэтээтэ. Ол туоһутунан Николай Еттянов Кул Джет ата бу күрэхтэһиигэ 2000 м. сэттэ аттан иккис кэлэн өрөспүүбүлүкэҕэ биллэр күүстээх аттар кэккэлэригэр киирбитэ уонна Манчаары оонньууларын сүүрдүүтүгэр бэйэтин дистанциятыгар бастаабыта буолар. Инникитин даҕаны ситиһиилэр кэлэ туруохтарыгар эрэлин биллэрдэ.
Мантан салгыы балаҕан ыйыгар Тыа хаһаайыстыбатын министерствотын бирииһигэр уонна Эҥсиэли Кубогын иһин улахан сүүрдүүлэр Үөһээ Бүлүү улууһун аттарын күүтэллэр.