“Чэгиэн-чэбдик хотун” куонкуруска көстүбэт фронт үлэһиттэрэ кытыннылар

198

Мэҥэ-Хаҥалас улууһугар, Бөкөҕө, сынньалаҥ киинин үлэһиттэрин көҕүлээһиннэринэн нэһилиэк общественноһын уонна дьаһалтатын өйөбүлүнэн, көстүбэт фронт үлэһиттэригэр, “Чэгиэн чэбдик хотун” диэн ураты конкурс иккис төгүлүн ыытылынна. Бу сырыыга кыттааччы ахсаана элбэҕинэн уонна эр дьон кыттыыны ылбытыттан тэрээһин болҕомтону тардарын, кэскиллээҕин бигэргэттэ.


Куонкуруска барыта 14 киһи Бэдьимэттэн, Хараттан, Дьокуускайтан, Табаҕаттан, Майаттан, Лоомтукаттан, Чүүйэттэн алта түһүмэххэ күөн көрүстэ. Үгэс быһыытынан, бастакы түһүмэххэ кимтэн кииннээхтэрин, хантан хааннаахтарын блиһиннэрдилэр. Саха көмүлүөк оһоҕун иннигэр олордо да олоҥхоһут, оҕуһун мииннэ да ырыаһыт дииллэрин курдук, иккис түһүмэххэ, талааннарын көрдөрөн көрөөччүлэр, дьүүллүр сүбэ биһирэбиллэрин ыллылар. Үһүскэ көрү-нары көҕүлүттэн тутаннар, саала иһин “быара суох” ыыттылар. Төрдүскэ араас стиллээх таҥаһы-сабы кэтэн, урукку сыллар муодаларын илэ-бааччы эргитэн, киэргэнэн, муусука тыаһыгар уйдаран хааман наскылдьыйыылара ытыс тыаһынан доҕуһуолланна. Ол кэннэ астаан аҕалбыт бүлүүдэлэрин билиһиннэрдилэр, саалаҕа мустубут ыалдьыттарга амсаттылар. Бүтэһиккэ сахалыы таҥас маанытын, ситэритин билиһиннэрдилэр.

Күөн күрэс түмүгүнэн үһүс бочуоттаах миэстэни Майатааҕы Д.Ходулов аатынан норуот айымньытын киинин үлэһитэ Варвара Шишигина, иккис миэстэни Бөкө оскуолатын эдэр үлэһитэ Алла Иванова, бастакы миэстэни Майаттан “Майа-фирма” үлэһитэ Светлана Охлопкова ыллылар. Онтон Гран Прины В.Скрябин аатынан оскуола асчыта Дария Еремеева (Чүүйэ) ылла. Кыайыылаахтар спонсордар олохтообут сыаналаах бириистэрин туттулар. Куонкуруска кыттыыны ылбыт дьон бары анал номинацияҕа тиксэн дипломнары, сэмэй бэлэхтэри туттулар. Култуура үлэһиттэрин профсоюһун бэрэссэдээтэлэ Э.Павлова профсоюз харчынан бирииһин В.Шишигинаҕа туттарда. Дьүүллүүр сүбэҕэ олохтох дьаһалта баһылыга И.Новгородов, Догдоҥо оскуолатын дириэктэрэ И.Филиппов, улуустааҕы култуура управлениетыттан Э.Павлова, олохтоох дьаһалта баһылыгын солбуйааччы И.Павлова, дьаһалта исписэлииһэ А.Турчина үлэлээтилэр.

Бу киэһэ болҕомтону тардыбыт, сэргэхсиппит тэрээһиҥҥэ бириистэринэн көмөлөспүт олохтоох дьаһалтаҕа (баһ. И.Новгородов), Д.Ходулов аатынан тыйаатырга, дьиэ кэргэни, ыччаты кытары үлэлиир, пенсионнай, ветеринарнай управлениеларга, меценат М.Шипошинаҕа, ОДьКХ салалтатыгар, коллекционердар салайааччыларыгар Н.Никанороваҕа, “Талер” маҕаһыыҥҥа (сал.Д.Катакинов), ИП Н.Старостиҥҥа, МУПК тэрилтэтигэр (сал. И.Скрябин), “Далбар” маҕаһыыҥҥа (сал. А.Новгородова), “Акватранс” ХЭУо (сал. М.Степанов), Майа сэлиэнньэтигэр дьахтар комитетын салайааччытыгар Е.Баишеваҕа, култуура үлэһиттэрин профсоюһугар (предс. Э.Павлова), Догдоҥо орто оскуолатыгар (дир. И.Филиппов), депутат И.Пивоваровка, “Туллукчаан” оҕо саадыгар (сал.А.Морозова) тэрийээччилэр уонна кыттааччылар махталларын биллэрдилэр.

Сэргэх куонкуруһу саҕалаабыт бөкөлөр, бу тэрээһиннэрин салгыыр, кэҥэтэр, сайыннарар, кэлэр өттүгэр эр дьону кытыннарар сыаллаах балаһыанньатын уларытан, ситэрэн-хоторон биэрэр баҕалаахтарын иһитиннэрдилэр. Ону дьон-сэргэ улаханнык биһирээтэ.