Чурапчыга «Баҕа санаа харыйата» баар

519

«Чурапчы нэһилиэгэ» муниципальнай тэриллии уонна дьиэ кэргэни кытта үлэлэһэр киин бу сыл ахсынньы 14 күнүгэр #ба5асанаахарыйата диэн  акция тэрийэн ыыттылар. Тэрээһин дьоҥҥо наадалааҕын бэлиэтээтилэр.


Акция нэһилиэккэ олорор социальнай балаһыанньалара ыарахан туруктаах ыаллар оҕолоругар көмөлөһөр сыаллаах ыытылынна. Эрдэ былааннаныллыбытын курдук бу иннинэ хас биирдии оҕо баҕа санаатын кумааҕы сүрэхтэргэ суруйан «Баҕа санаа харыйатыгар» иилбитэ.

Киин нэһилиэк улахан, кыра тэрилтэлэрин коллективтара, предпринимателлэр бу акцияҕа олус көхтөөхтүк кыттан, кылгас кэм иһигэр бэлэхтэри атыылаһан хас биирдии оҕо баҕа санаата туоларын ситистилэр. Бу акцияны тэрийээччилэр улууспут дьоно үтүө санаалаахтарын, аһыныгас сүрэхтээхтэрин үөрэ бэлиэтээн барыларыгар махталларын тиэрдэллэр.

Чурапчы нэһилиэгин баһылыга С.А.Саргыдаев «Баҕа санаа харыйата»
акция тэрийээччитэ

Ис сүрэхтэн бэлэхтэммит оонньуурдар кырачаан дьоммутугар күн сиригэр үтүө баарын бигэргэтэн дьоллоох оҕо саастарыгар биир сырдык өйдөбүлүнэн буолуоҕа. Кинилэр хайаан даҕаны дьоһун-мааны, дойдуларын таптыыр дьон буола улаатыахтара. «Баҕа санаа харыйата» кырдьык дьикти кэм кэрэһитэ буолан Саҥа дьыл ураты сырдык эйгэтин сүрэх аайы иҥэрдэ.