Үөһээ Бүлүүгэ гиирэни анньыыга аан дойду чемпионун чиэстээтилэр

160

Гиирэ спордугар эдэрдэргэ Россия сүүмэрдэммт хамаандатын чилиэнэ, элбэҕи эрэнэ кэтэһэр уолбут Михаил Саввинов алтынньы 24 — 30 күннэригэр Казахстан Актобе куоратыгар ыытыллыбыт Аан дойду чемпионатыгар чаҕылхайдык кыттан бар дьонун үөртэ. Кини ыччаттарга 68 киилэҕэ улуу Россия чиэһин көмүскүүр үрдүк чиэскэ тиксэн чемпион аатын ылла. Дойдутугар, Үөһээ Бүлүүгэ, Михаилы уруйдуур дьоро киэһэҕэ доҕотторо, дьонноро, аймахтара, тренердэрэ, эдэр спортсмен спортивнай олоҕун биһириир дьон түмүстүлэр.


Саалаҕа толору мустубут бар дьонугар туһаайан, Миша Саввинов кыайыытын-хотуутун сүүһүнэн киһи үллэстибититтэн долгуйарын, үөрэрин эттэ. Урууларыгар, бииргэ үөрэммит доҕотторугар, кылааһын салайааччытыгар С.П.Захароваҕа, гиирэ спордугар хатарылларыгар уһуйбут бастакы тренеригэр Николай Кардашевскайга, Василий Дьячковскайга, чиэстээһини тэрийбит улуустааҕы спорт управлениетын бары үлэһиттэригэр, чуолаан Егор Николаевка, улууһун баһылыгар Владимир Поскачиҥҥа, солбуйааччытыгар Люция Тойтоноваҕа, улуус сэбиэтин бэрэссэдээтэлигэр Семен Михалевка, исписэлиис А.И.Васильеваҕа, култуура эйгэтин үлэһиттэригэр махтанна, бары кэрэни, үтүөнү баҕарда.

Долгутуулаах киэһэҕэ Миша төрөппүттэригэр Светлана Николаевнаҕа, Афанасий Афанасьевичка улуус баһылыга Владимир Поскачин, Далыр баһылыга Георгий Иванов махтал суруктары, дьиэ кэргэн отдела сыаналаах бэлэҕи дохсун ытыс тыаһыгар доҕуһуоллатан туттардылар. Үтүө санаалаах, эйэҕэс майгылаах, туруоруммут сыалын ситиһэр дьулуурдаах оҕону ииппиттэригэр истиҥник махтаннылар. СӨ спорт министиэристибэтин аатыттан бочуотунай грамота туттарылынна.

Салгыы Владимир Поскачин эҕэрдэ тылы кытта Миша Саввиновка 50000, «Үөһээ Бүлүү» сэлиэнньэтин баһылыга Николай Николаев 10000, улуус сэбиэтин бэрэссэдээтэлэ Семен Михалев 5000, Исиидэр Бараахап аатынан орто оскуола кэллэктииибэ 10000 сууммалаах сертификаттары туттардылар. Эдэр киһи сайыннын, дойдутун аатын ааттаттын диэн баҕа санааларын этэн туран сыаналаах сертификаттары ыччат отдела, Далыр, Тамалакаан нэһилиэктэрэ, урбаанньыттар Семен Тумусов уонна Аркадий Долгунов, улуустааҕы 12-с №-дээх баһаарынай чаас аатыттан начаалынньык Виктор Новиков, оҕо дьиэтин кэллэктибэ туттардылар. СӨ гиирэ спордун федерациятын бэрэссэдээтэлэ Илья Саввинов, гиирэ спордун улуус сүүмэрдэммит хамаандатын тренерэ Николай Кардашевскай, оҕо спортивнай оскуолатын дириэктэрэ Валерий Семенов, улуустааҕы үөрэх салалтатын начаалынньыга Александр Поскачин, «Мааппа» маҕаһыын хаһаайката Марфа Еттянова, «Саина» атыы-эргиэн ырыынага, «Милана» маҕаһыын, «Суши-тайм», «Александра» буфеттар, «Аартык» тэрилтэ кэллэктииптэрэ спортсмеҥҥа уу харчынан бириэмийэлээтилэр. Маны сэргэ, Үөһээ Бүлүүтээҕи лицей интернат үөрэнээччилэрэ бэйэлэрэ оҥорбут сувенирдарын бэлэхтээн чемпион үөрүүтүн хас да бүк үрдэттилэр.

Долгутуулаах киэһэҕэ мустубут дьон уолларын хайҕаатылар, инникитин өссө элбэх ситиһиилэнэн бу курдук биир дойдулаахтарын үөрдэ турарыгар баҕардылар, алгыс тылларын анаатылар.