Элбэҕи кэпсиир бэртээхэй кинигэ

516

Үөрэ көрсөр общественнай кэрэспэдьиэммит Петр Михайлович Павлов туһунан сэһэргиир «Петр Павлов. Дьулуур, тулуур күүһүнэн» диэн кинигэ күн сирин көрдө. Ону сүрэхтиир үөрүүлээх тэрээһин Дьокуускайга Бэчээт дьиэтигэр бэрт истиҥник буолла.


88 саастаах Петр Михайлович билигин да хоп курдук. Кинигэ таһыгар «өссө манныгы кэпсиэм этэ ээ» диирдии туттан, эйэҕэстик көрөн олороро киһиэхэ эрчими биэрэргэ дылы. Кинигэни тутаат, хайдах эрэ кинилиин сэһэргэһэн барар курдуккун. Бэйэм туспунан бэйэм; Ис сүрэхтэн тахсыбыт хоһооннорум; Сэбиэт Бүөтүр; Кыраайы үөрэтээччи; Таайбыт, убайбыт туһунан истиҥник; Киэн туттар үөлээннээхпит; Күндү дьоммут туһунан иһирэхтик; Элэйбэт сытыы бөрүө; Өрөгөйдөөх күннэргэ диэн тоҕус түһүмэхтээх. Киирии тыллары Амма улууһун баһылыга Н.Архипов, Сулҕаччы нэһилиэгин баһылыга А.Ксенофонтов суруйбуттар. Кинигэни Петр Михайлович хоһоонугар хоһуйбут Сулҕаччытын нэһилиэгин бибилэтиэкэрэ Е.Попова хомуйан оҥорбут. Матырыйааллары кыыһа, «Саха сирэ» хаһыат эппиэттиир сэкэрээтэрэ, СӨ култуура үтүөлээх үлэһитэ Т.Павлова дьаарыстаабыт, эрэдээксийэлээбит. Онон бэйэлэрин үлэлэрин чахчы баһылаабыт дьон сыа-сым курдук тутан чочуйбут буоланнар, кинигэ тыла-өһө, оҥоһуута ааҕааччыны тардар күүстээх. Манна эбии элбэх хаартыскалар киллэриллибиттэрэ силигин ситэрэн-хоторон биэрбиттэр. Сүрэхтэнии киэһэтин Амма улууһун киин бибилэтиэкэтин кыраайы үөрэтэр отделын сэбиэдиссэйэ В.Стручкова ыытта.

Долгутуулаах бэлиэ күнүнэн улуус баһылыгын социальнай боппуруостарга солбуйааччы П.Емельянова, суруйааччы биир дойдулааҕа Д.Наумов, «Саха бэчээт» АУ генеральнай дириэктэрэ Ф.Пестряков, Сулҕаччы нэһилиэгин баһылыга А.Ксенофонтов, кииннэммит бибилэтиэкэ тиһигин дириэктэрэ С.Макарова уо.д.а. истиҥ эҕэрдэлэрин тиэртилэр. Ыалдьыттар истиҥ тылларга кыттыһан Петр Михайлович үтүөкэн сүбэһит, амарах аҕа, тапталлаах кэргэн, ытыктанар аймах буоларын бэлиэтээтилэр. Дьоҥҥо амарах сыһыанын, төрөөбүт дойдутугар тапталын, киэҥ билиитин-көрүүтүн эдэр ыччакка сөҕөн, хайҕаан, киэн туттан кэпсээтилэр. Тулаайах оҕо аҥардас дьулуурунан уонна тулуурунан киһи хара буолбутун, нэһилиэгин салайсыбытын эттилэр, киниэхэ «Амма киэн туттуута» диэн бэлиэ чахчы да ананыан ананна диэн улаханнык үөрдүлэр.

Түмүккэ, Петр Михайлович:

Кинигэм элбэх киһи үтүө көмөтүнэн, сүбэтинэн сиэрэ ситэн күн сирин көрдө. Улуус баһылыга Николай Архипов, баһылыгы солбуйааччы Прасковья Емельянова, Амматааҕы кииннэмит бибилэтиэкэ дириэктэрэ Светлана Макарова өйөөтүлэр, үп өттүнэн көмөлөстүлэр. Маны тэҥэ нэһилиэгим дьонун-сэргэтин сырдык санаалара, эрэллэрэ, итэҕэллэрэ улахан тирэх буолла. Үйэм уһаан тугу эмэ суруйа, бооччойо түспүт киһи диэн баҕалаахпын. Аммам дьоно барахсаттар, куоракка, тыаҕа олороргутуттан тутулуга суох түмсүүлээх буолуҥ, биир өйүнэн-санаанан үлэлээҥ. Бу үүммүт сылы өрө көтөҕүллүүлээхтик саҕалааҥ, оччоҕо сылгыт түмүгэ ситиһиини тосхойуо, — диэн алгыс тылын анаата.

Онтон биһиги сыппаабат бөрүөлээх общественнай кэрэспэдьиэммитигэр тулхадыйбат санааны, ыанньыйан туран өссө айа-тута турарыгар, чиргэл тиит курдук чиҥник үктээн чэгиэн сылдьарыгар баҕарабыт.