Покровскай куоракка «Арчы” дьиэтин үлэһиттэрэ бастакы тыллар сибэккини уруйдаан иккис сылын ыам ыйын 18-гар Ньургуһун күнүн бэлиэтииллэр.
Иэйэхсит ыйын көрсө бу нэдиэлэ иннинэ Хаҥалас улууһугар култуура управлениетын салайааччыта Сахаайа Громова этии киллэрэн дьаһалта үлэһиттэригэр Иэйэхсити иҥэрии туомун толорон баран Ньургуһун күнүн көрсө тэрээһин ыыттылар. Бу күн күндү ыалдьыт буолан кытыннылар Халыматтан төрүттээх баяниспыт Валерий Бубякин, эмтээх отторунан дьарыктанар Маргарита Аввакумова. Маргарита Николаевна ньургуһунунан хайдах эмтэнэри, хаһан хомулларын билиһиннэрдэ.
Онтон олохтоохторго анаан ньургуһун күнэ тэрилиннэ. Бу күн Лидия Харитонова арчылаата уонна ньургуһун күнүн туһунан сырдатта.
Тэрээһиҥҥэ «Утум» дьахталлар, “Дьулуур” бэтэрээннэр ансаамбыллара, мелодист, ырыаһыт Александр Уваровскай кытыннылар. Покровскай куорат дьокутаата, Хаҥалас улууһун маастардарын «Уран» түмсүү салайааччыта Лариса Константинова «Ньургуһуннар 100 ырыа» диэн Варвара Федорова-Сэйгэ саҥа ырыаанньыгын билиһиннэрдэ.
«Саха сирин олохтоохторо маннайгы сааскы сибэккини үтүө холобур оҥостон Ньургуһун күнүн көхтөөхтүк ыллаан-туойан көрсөрбүт буоллар, олус кэрэ, умнуллубат бырааһынньык буолуо этэ«, — диир Лидия Харитонова.
Онон ньургуһун курдук тулуурдаах, дьулуурдаах, көхтөөх, кэрэ-нарын дууһалаах, сирбитин, дьоммутун киэргэтэр дьон буола чэчириэххэйиҥ, сайдыаххайыҥ, кэрэни көҕүлүөххэйиҥ.