Мэҥэ Хаҥаласка «Төрөппүт сүбэтэ» уопсастыбаннай тэрилтэ тэрилиннэ

250

Муус устар 6 күнүгэр Мэҥэ Хаҥалас киинигэр Майаҕа Р.Г.Васильев аатынан кыраайы үөрэтэр музейга үөрэҕирии салалтата тэрийиитинэн, улуус төрөппүттэрин сүбэ-мунньаҕын ыыттылар. Манна «Төрөппүт сүбэтэ» тэрилиннэ.


Үөрэҕирии управлениетын иитэр үлэҕэ отдел начальнига Марианна Билюкина үөрэх эйгэтин иһинэн төрөппүтү кытта үлэни тэрийии, иитиигэ көстөр кыһалҕаларга тохтоото, сүрүн хайысхалары билиһиннэрэн, туох үлэ ыытылларын кэпсээтэ.

Сокуоннай саастарын туола илик оҕолор буруйу кэһиилэрэ, хомойуох иһин, кыыс оҕо өттүттэн буруйу кэһии көрдөрүүтэ улаата турарын, бу салааны сүрүннүүр отдел специалиһа Ньургуяна Варламова чахчыларга олоҕуран иһитиннэрдэ.

Оҕолорбут итирдэр утаҕы иһиилэрэ, ордук кыргыттар охсуһуулара бэлиэтэнэр. Бу көстүү барыта дьиэ кэргэнтэн тахсарын бары төрөппүт өйдүөх тустааҕын бэлиэтиир тоҕоостоох.

«Кэскил» киин психолога Нина Слободчикова билиҥҥи кэмҥэ оҕо-ыччат, төрөппүт, уһуйааччы олоххо сыаннастарыгар тиэмэтин таарыйда. Оҕолор, төрөппүттэр, педагогтар уонна учууталлар ханнык олох сыаннастарын ордук чорботоллорун итиэннэ ханныктары кэнники миэстэҕэ туталларын холобурдаата.

Бэдьимэ нэһилиэгэр хаһыс да сылын орто оскуола, нэһилиэк салалтата, түөлбэлэр кыттыһан, нэһилиэккэ иитэр эйгэни тэрийиигэ «Дьөһүөл» тосхолу улэлэтэр уопуттарын дириэктэри иитэр-үөрэтэр үлэҕэ солбуйааччы Екатерина Попова уонна төрөппүттэр кэпсээтилэр. Павловскай орто оскуолатын дириэктэрин иитэр-үөрэтэр үлэҕэ солбуйааччыта Татьяна Оконешникова Нөөрүктээйи нэһилиэгэр биир кэлим иитии ситимин тэрийии туһунан сиһилии кэпсээтэ. «Төрүччү педагогикатын» туһунан дьиэ кэргэн педагога Любовь Платонова ийэ, аҕа аатын сүкпүт дьиэ кэргэн сиэннэрин тустарыгар олоруохтаахтарын, өбүгэлэр оҕону иитиигэ мындыр ньымаларын, норуот педагогикатын, оҕо төрөөтөҕүнэ ийэтин эбэтэр аҕатын төрүттэринэн кимиэхэ майгылыыр буоларын туһунан бэрт интэриэһинэй кэпсэтиини таһаарда.

Мунньах түмүгүнэн улуустааҕы төрөппүт сүбэтин таллылар. Аллараа Бэстээхтэн Сергей Федорович Шарин, Нөөрүктээйиттэн Ирина Николаевна Кириллина, Майаттан Анна Владимировна Тарасова уонна Зоя Афанасьевна Герасимова киирдилэр.