Ааспыт ыйга Муомаҕа Улахан Чыыстай нэһилиэгэр полиция капитана Василий Бурцев тустаах эбээһинэһин толоро сылдьан, сидиҥ дьон илиититтэн былаҕайга былдьаммыта.
Василий Васильевич ис дьыала уорганнарыгар үлэтин 1995 сыллаахтан саҕалаабыта. Муома оройуонугар оперативнай дьуһуурунайынан 2008 сыллаахха анаммыта. Үлэтигэр эҥкилэ суох бэриниилээҕин, ылсыбытын тиһэҕэр тиэрдэр дьулуурдааҕын, дьоҥҥо-сэргэҕэ куруук үтүөнү эрэ баҕаран көмөлөһөрүн бары уйадыйа саныыллар. Василий Улахан Чыыстайга 2013 сылтан участковайдаабыта. Бэрээдэги кэһээччилэри, учуокка турааччылары, урут сууттаммыт дьону кытта тиһиктээхтик үлэлэһэрэ, көнө суолга туралларыгар баҕарара.
Нэһилиэк, оройуон олохтоохторо Василий Васильевиһы улаханнык сөбүлээбиттэрэ. Кини чөл олоххо сирдиирэ, спордунан дьарыктанара үтүө холобур буолара. Үлэлиир кэллэктиибигэр саҥа, сонун хайысхалары көҕүлээн киллэрбитэ. Ол курдук, 2008 сыллаахха, кэргэнэ Айталы Алексеевналыын оройуоҥҥа аан бастакынан быраабы араҥаччылыыр уорганнар спартакиадаларын тэрийбиттэрэ. Полиция үлэһиттэрин күүстэринэн умнуллубат бэртээхэй концерт тэрийбиттэрэ. Тэрээһиннэргэ, күрэхтэһиилэргэ үөлээннээхтэрэ көхтөөхтүк кыттар буолбуттара.
Билигин В.В.Бурцев аатын үйэтитэргэ Василий Стрекаловскай начаалынньыктаах полиция отдела олук уурар. Спартакиадаҕа полиция капитанын үтүө аатын иҥэрэн, сыл аайы үгэс курдук далааһыннаах тэрээһини оҥорор былааннаахтар. Ону сэргэ, СӨ Бырабыыталыстыбатын наҕараадатын биэрэр туһунан ходатайство суруйдулар. Онтон олохтоохтор нэһилиэктэрин биир уулуссатыгар Василий Бурцев сырдык аатын иҥэрэргэ туруорсан этии киллэрдилэр.