Бэс ыйын 1 күнэ – Оҕо көмүскэлин күнэ. Бу күн Нам улууһун киинигэр Доҕордоһуу болуоссатыгар оҕо-аймах тоҕуоруһа мустан, илии-илиилэриттэн ылсан сэлэлии хаамтылар, дуоһуйа оонньоотулар, ыллам ырыалары ыллаатылар, үҥкүүлээн дайдылар.
Мустубут оҕолору, ийэлэри «Нам улууһа» МТ баһылыгын бастакы солбуйааччы Инна Сивцева, улуус депутаттарын Сэбиэтин председателэ Иван Попов, улуустааҕы үөрэх управлениетын салааччытын э.т. Иван Ноговицын, «Ленскэй нэһилиэк» МТ баһылыга Андрей Новгородов итиитик-истиҥник эҕэрдэлээтилэр.
Бырааһынньык кэмигэр улуустааҕы, өрөспүүбүлүкэтээҕи куонкурустар, фестиваллар кыайыылаахтара кэнсиэрдээтилэр, 14 саастарын туолбут оҕолорго үөрүүлээх быһыыга-майгыга РФ гражданиннара буолбуттарын туоһулуур пааспардарын туттартаатылар.
Оҕо саад иитиллээччилэрин икки ардыларыгар «Маанылаах таҥас», «Оһуокай», «ЭкоМода», «Близнецы», оҕо кэлээскэтин киэргэтии куонкурустар олус тэрээһиннээхтик ыытылыннылар. Маны таһынан, Экология сылынан «Бары уруһуйдуубут» бырайыак чэрчитинэн улуус нэһилиэктэрин дьыссааттарын иитиллээччилэрин уруһуйдарын, көтөргө-сүүрэргэ уйа оҥорбуттарын дьүүллүүр сүбэ көрөн кыайыылаахтары наҕараадалаата, оҕолорго аналлаах маастар кылаастары ыыттылар.
Биир үөрүүлээх түгэнинэн Доҕордоһуу болуоссатын фонтааныгар оҥоһук кубалары ууран, сайыҥҥы кэмҥэ холбооннор, оҕолор үөрүүлэрэ үксээтэ, чуопчаарар саҥалара элбээтэ.