РФ Бэрэсидьиэнэ 2012 сыл бэс ыйын 10 күнүнээҕи 805 №-дээх дьаһалынан Бүтүн дойду үрдүнэн, муус устар 21 күнэ “Олохтоох бэйэни салайыныы” күнүнэн биллэриллибитэ.
Дьаһал оҥоһуллуутугар XVIII үйэҕэ императрица Екатерина II «Жалованная грамота городам» диэн Ыйааҕа бастакы төрүөтүнэн буолбута. Бу бэлиэ күнүнэн сибээстээн, бээтинсэҕэ, улуус дьаһалтатын мунньахтыыр саалатыгар үөрүүлээх быһыыга-майгыга планерка ыытылынна. Планерка Василий Уһунуускай-Сэки тылыгар, Василий Зырянов матыыбыгар Нам улууһун Өрөгөй ырыатынан саҕаланна. Мустубут дьону улуус баһылыга Александр Атласов эҕэрдэлээтэ. Маны таһынан, олохтоох бэйэни салайыныы олоххо киириитин туһунан баһылыгы солбуйааччы Николай Степанов, кыраайы үөрэтээччи Иннокентий Кривошапкин, улуус дьокутааттарын Сэбиэтин бэрэссэдээтэлэ Иван Попов, улуус бастакы баһылыгын солбуйааччы Галина Алексеева-Кардашевская билиһиннэрдилэр, эҕэрдэлэрин тиэртилэр.
Тыа сирин тупсаҕай оҥоруу, дьиэ-уот коммунальнай өҥөтүнэн сөптөөхтүк хааччыйыы, нэһилиэнньэ доруобуйатын туруга, ыччат үөрэҕи ылыыта, култуура төрүт үгэстэрин чөл хаалларыы, онтон да элбэх тыын суолталаах боппуруос улуустар уонна нэһилиэктэр баһылыктарын, олохтоох салайыныы бэрэстэбиитэллээх уорганнарын дьокутааттарын дьулуурдаах уонна дьоһуннаах үлэлэриттэн тутулуктаах. Олохтоох бэйэни салайыныы үлэлииригэр сөптөөх сокуоннар, уураахтар, дьаһаллар ылыныллан, тиһигин быспакка, күүһүрэн, улаатан иһэллэр.
Үөрүүлээх планеркаҕа «Нам улууһун бастакы баһылыгын аатынан муниципальнай бириэмийэ» куонкурус кыайыылааҕар «Нам улууһа» МТ дьаһалтатын финансовай управление начальнигар Парасковья Аргуноваҕа диплому кытта 20 тыһ. суумалаах бириэмийэни туттардылар. «Муниципальнай сулууспа туйгуна» өрөспүүбүлүкэтээҕи куонкурус кыайыылааҕа, Партизан нэһилиэгин баһылыгын солбуйааччы Полина Скрябина диплом уонна 10 тыһ. бириэмийэ тутта. «СӨ муниципальнай сулууспатын бэтэрээнэ» бэлиэнэн Нам улууһун уонна 1 Хомустаах нэһилиэгин бочуоттаах олохтооҕо Николай Горохов наҕараадаланна. Маны таһынан, 2016 сыллаахха Бүтүн Арассыыйатааҕы тыа хаһаайыстыбатын биэрэпиһигэр сыраларын ууран үлэлээбит үлэһиттэргэ «За труды в проведении Всероссийской сельскохозяйственной переписи 2016 года» мэтээли дохсун ытыс тыаһыгар доҕуһуоллатан туттардылар.
Олохтоох бэйэни салайыныы киирбитэ уонча сыл буолла. Бу сылларга улууспут, нэһилиэктэрбит саҥа тыын ылан сайдыы суолунан инники диэки дьулуһаллар. Манна хас биирдии нэһилиэк баһылыктара, улуус уонна нэһилиэк дьокутааттара элбэх өрүттээх үлэ ыыталларын бэлиэтиир тоҕоостоох. Улууспут хас биирдии киһитэ РФ Президенэ, Саха Сирин Ил Дархана уонна Бырабыыталыстыбалара ыытар үлэлэрин сөпкө өйдөөн, онно күүс буолан, улууспут сайдыытыгар үлэлээн-хамсаан билиҥҥи үйэ ирдиир түргэн тэтимиттэн хаалсыбакка кэллибит. Экономика, производство, дьоҕус уонна орто предпринимательство, үөрэҕирии, социальнай эйгэ салааларыгар улахан уларыйыылар бардылар, араас бырайыактар оҥоһуллан олоххо киирэллэр.
