Нам улууһугар Өрөспүүбүлүкэ күнүн көрсө

368

Бэҕэһээ, муус устар 24 күнүгэр, Өрөспүүбүлүкэ күнүн көрсө Ил Дархан Егор Борисов уонна Саха сирин бигэ туруктаахтык үүнэ-сайда турарыгар үлэлии-хамсыы сылдьар үрдүк сололоохтор Нам улууһугар кэлэннэр, үгэскэ кубулуйбут тэрээһиҥҥэ кыттыыны ыллылар.


Өрөгөйдөөх ытык бэлиэ күн чэрчитинэн норуот туһугар бэриниилээхтик, хотуулаахтык, эҥкилэ суох үлэлээбит Илья Егорович Винокуров сырдык аатыгар сүгүрүйэн, Аппааныга сылдьан кини өйдөбүнньүгэр сибэкки дьөрбөтүн уурдулар. Санатан аастахха, былырыын бөдөҥ судаарыстыбаннай уонна политическай диэйэтэл Илья Винокуров сылыгар культурнай тэрээһинтэн саҕалаан, сквер тутуутугар тиийэ үтүө түмүктээх, араас таһымнаах үлэлэр ыытыллыбыттара.

Уһулуччулаах политическай уонна судаарыстыбаннай диэйэтэл Максим Аммосов үйэлэргэ умнуллубат сыратынан киэн туттабыт. Кини мындыр, туохтан да толлубат сырдык санаатынан Өрөспүүбүлүкэбитигэр автономияны киллэриигэ дьаныардаахтык сүүрбүтэ-көппүтэ. Көрсөр күчүмэҕэйдэриттэн хаһан даҕаны толлубатаҕа, дьонун-сэргэтин таҥнарбатаҕа. Маны санаан туран, өрөспүүбүлүкэтээҕи делегация улуу Максим Аммосов төрөөбүт дойдутугар, Хатырык нэһилиэгэр, судаарыстыбаннас мусуойугар тиийэн политическай уонна судаарыстыбаннай диэйэтэл сырдык аатыгар сүгүрүйэн, кини өйдөбүнньүгэр сибэкки дьөрбөтүн уурдулар.

Үөрүүлээх тэрээһин сүрүн чааһыгар Ийэ дойдубут, өрөспүүбүлүкэбит, улууспут сайдыытыгар сүҥкэн кылааты киллэрбит дьон: «Ленскэй нэһилиэк» МТ баһылыга Андрей Новгородов «СӨ муниципальнай сулууспатын туйгуна», «Хатыҥ Арыы нэһилиэгэ» МТ баһылыга Юрий Слепцов «СӨ норуотун хаһаайыстыбатын үтүөлээх үлэһитэ», «Нам улууһа» МТ дьаһалтатын олохтоох бэйэни салайыныы отделын кылаабынай исписэлииһэ Мария Макарова «Гражданскай килбиэн» бэлиэнэн наҕараадаланнылар. Маны таһынан, Мэҥэ Хаҥалас улууһун «Хара нэһилиэгэ» МТ, Хаҥалас улууһун «Хачыкаат нэһилиэгэ» МТ баһылыктарыгар РФ президенин геральдическай Сэбиэтин сибидиэтэлистибэтин туттардылар.