Сыл аайы буоларын курдук, Нам улууһун баһылыга Александр Атласов 2017 сылга оскуоланы кыһыл уонна үрүҥ көмүс мэтээлинэн бүтэрбит выпускниктары чиэстиир көрсүһүүтэ буолла.
2016-2017 үөрэх сылыгар улуус үрдүнэн 214 үөрэнээччи оскуоланы бүтэрдэ, онтон 29 үөрэнээччи кыһыл уонна 1 үөрэнээччи үрүҥ көмүс мэтээлинэн үөрэхтэрин түмүктээтилэр. Үрдүк кыһаҕа уһуйбут оскуолалар: Нам улуустааҕы гимназията – 12, Хамаҕатта саха-французскай лицейэ – 6, Нам 2-с №-дээх орто оскуолата – 4, Хатыҥ Арыы орто оскуолата – 2, Үөдэй орто оскуолата – 2, 1 Хомустаах орто оскуолата – 1, Нам 1-кы №-дээх орто оскуолата – 1, Хатырык орто оскуолата – 1 кыһыл көмүс медалистардаах уонна Бөтүҥ орто оскуолата – 1 үрүҥ көмүс медалистаах.
Оҕолор кыахтарын, киэн билиилэрин биир кэлим судаарыстыбаннай эксээмэн түмүктэрэ өссө төгүл бигэргэттэ. Ол курдук, Нам улуустааҕы гимназиятын выпускниктара Изюкова Дарья нуучча тылыгар 100 баалы, информатика предметигэр 97 баалы, математика профильнай таһымыгар 96 баалы ылары ситистэ, ону тэҥэ Овчинникова Евгения нуучча тылын 96 баалга туттарда. Медалистар ортолоругар бүтүн сойуустааҕы үөрэнээччилэр олимпиадаларын, «Инникигэ хардыы» научнай-практическай конференция, араас спортивнай, интеллектуальнай күрэхтэһиилэр кыайыылаахтара, призердара бааллар. Кулун тутар ыйга Намҥа ыытыллыбыт Россия үрдүк үөрэх кыһаларын XII республикатааҕы предметнэй олимпиадаларын түмүгүнэн 36 выпускник үрдүк үөрэх кыһаларыгар киирэргэ рекомендация ылбыттар.
Үөрүүлээх тэрээһиҥҥэ туйгун выпускниктар ааттарыттан Дарья Изюкова билии киэҥ аартыгын сахпыт учууталларыгар, төрөппүттэригэр махтаналларын биллэрдэ. Төрөппүттэр оҕолоро ханна да үөрэнэ бардаллар төрөөбүт улуустарын умнубаттарыгар, чаҕылхай, чулуу биир дойдулаахтарбыт Илья Егорович Винокуров, Максим Кирович Аммосов ааттарынан киэн тутталларыгар, оскуолаларын, дьиэлэрин-уоттарын өрүү саныы сылдьалларыгар санааларын эттилэр.
Быйыл Максим Аммосов төрөөбүтэ 120 сылынан анаан, кини пааматынньыгар бараннар сибэкки дьөрбөтүн уурдулар, өйдөбүнньүк хаартыскаҕа түстүлэр.