Нелемнэй нэһилиэгэр исписэлиистэргэ аналлаах дьиэ тутуллар

103

Үөһээ Халыма улууһун “Нелемнэй юкагир нэһилиэгэ” муниципальнай тэриллиигэ быйыл “Үтүө дьыала” хамсааһын көмөтүнэн эдэр исписэлиистэргэ аналлаах икки кыбартыыралаах дьиэ тутулла турар.


Эдэр исписэлиистэргэ анаммыт дьиэ кырыыһатын оҥордулар, стеклопакет түннүктэри туруордулар. Билигин ититэр ситимин тардаллар. «Барыта силигэ ситтэҕинэ, ахсынньы ыйга үлэҕэ киллэриэхпит. Нелемнэйгэ эдэр исписэлиистэргэ болҕомто ууруллара түмүктээх буолан эрэр. Биһиги онтон үөрэбит«, — диир баһылык Л.Н.Шадрина.

Тутуу хайысхатыгар эбии кэпсиир буоллахха, нэһилиэккэ спортивнай саала кырыыһатын өрөмүөннээтилэр. Онон эдэр ыччат, спортсменнар дьарыктаналларыгар усулуобуйа олохтонно. Улуус баһылыга Вячеслав Сергеев кыра нэһилиэк сайдыытыгар улахан болҕомтотун уурарын иһин олохтоохтор махтаналлар.


Быйыл сайын өрөспүүбүлүкэтээҕи бырагыраамаҕа олоҕуран, бөһүөлэк иһинээҕи суолу өрөмүөннээтилэр. Тупсарыы сылын чэрчитинэн оҕо былаһааккатын оҥордулар. Манна атаҕар туран эрэр предприниматель Екатерина Солнцева көмөлөспүтүн бэлиэтииллэр.