Муус устар ыйын түмүктүү Сааскылаах орто оскуолатын аактабай саалатыгар ССРС үөрэҕириитин туйгуна, Саха өрөспүүбүлүкэтин үөрэҕириитин үтүөлээх үлэһитэ, Анаабыр улууһун бочуоттаах олохтооҕо, долган омук төрүт таҥаһын-сабын, ииһин көҕүлээччи норуот маастара Алексеева Лидия Егоровна 70 сааһыгар диэри өбүгэлэрин үгэһин ыһыктыбакка илдьэ сылдьан быыстапкалаабыта 50, спортка көхтөөхтүк кыттыбыта 57 сылларынан, бу бэлиэ түгэнинэн айар киэһэтэ буолан ааста.
Бу үөрүүлээх дьоро киэһэни улуустааҕы мусуой исписэлииһэ, Лидия Егоровна уһуйааччыта Туприна Афанасея Спиридоновна көҕүлээн уонна Сааскылаах орто оскуолатын кэлэктиибэ өйөөн, иилээн-саҕалаан тэрийдилэр. Бу кэрэ-бэлиэ күн Лидия Егоровна үөрэппит-такайбыт, уһуйбут уран тарбахтаахтара, ыҥырыылаах ыалдьыттар кэлэннэр эҕэрдэ тыл эриэккэһин, алгыс маанытын анаатылар. Ол курдук, улуус дьаһалтатын аатыттан баһылыгы солбуйааччы Спиридонова Н.А., Сааскылаах нэһилиэгин баһылыгын солбуйааччы Туприна Т.А., Сааскылаах орто оскуолатын дириэктэрэ Алексеева Г.А., үөлээннээҕэ Туприн Н.Л. уонна да атыттар үөрүүнү үксэтистилэр.
“Өбүгэлэрбит тирии таҥастара, ойуулара-бичиктэрэ” кинигэ ааптара Лидия Егоровна норуот искусствотын эрэ буолбакка, национальнай аһы-үөлү, остуол оонньууларын кэнчээри ыччакка тарҕатар. Билигин кини уһуйааччыта Афанасея Туприна көҕүлээн, Лидия Егоровна айар үлэтэ түмүллүбүт альбом-кинигэ тахсарыгар үлэлэһэ сылдьар. Онуоха оскуола дириэктэрэ Галина Алексеевна кинигэ күн сирин көрөн бэчээттэнэн тахсарыгар үп-харчы өттүнэн өйүүрүн туһунан үөрүүлээх сонуну эппитин, мустубут дьон-сэргэ олус үөрдэ, биһирээтэ. Итиэннэ Лидия Егоровнаҕа айар үлэтин кэрэ-бэлиэ күнүнэн 100 тыһыынчалаах сеэртипикээт туттарда. Оттон Лидия Егоровна дьэрэкээн оҕуруонан симэммит сиэдэрэй оҥоһуктарын оскуолаҕа анаан бэлэхтээтэ.
Лидия Егоровна оскуолаҕа үлэлиирин тухары элбэх оҕону бэйэтин идэтигэр уһуйан кэлбитэ, билигин олор кини үөрэҕин чугастык ылынан бэйэлэрэ туспа суоллаах-иистээх, талба талааннаах иистэнньэҥ буола үүнэн-сайдан таҕыстылар. Бу биэчэргэ кини үөрэппит уран тарбахтаахтара кэлэннэр ойуулаан-бичиктээн тикпит таҥастарын, симэхтэрин, кэрэ киэргэллэрин, талба талааннарын көрдөрөн бар дьоннорун үөртүлэр. Ол курдук, уран тарбахтаахтар Прасковья Бороненко, Яна Спиридонова, Софья Акакиева, Надежда Толбонова, Афанасея Туприна долган уонна эбэҥки таҥаһын-сабын кэллиэксийэлэринэн муода көрдөрөн хаампыттара көрөөччүлэр биһирэбиллэрин ылыан ылла. Биэчэр түмүгэр төгүрүк остуол тула олорон ирэ-хоро кэпсэттилэр.
Лидия Егоровна курдук норуоттан силис тардан, үүнэн-сайдан тахсыбыт дьиҥнээх талааннаах маастардар баар буоланнар, норуоппут түҥ былыргыттан бүгүҥҥү күҥҥэ диэри, үйэлэри уҥуордаан төрүт мындыр дьарыктарын саамай күндүтүн, сүмэтин сүтэрбэккэ бэйэлэрин баар билиилэрин, сатабылларын үүнэр көлүөнэҕэ тиэрдэн, көлүөнэлэр ситимнэрин салгыы сайыннараллар.