Өҥөнү оҥорооччулар үйэ аҥардаах үбүлүөйдэрин «Олоҥхо» дьиэтигэр бэлиэтээтилэр. Дьоро киэһэҕэ урут бу хайысхаҕа үлэлээн сүҥкэн кылааттарын киллэрбит бэтэрээннэр итиэннэ күн бүгүнүгэр диэри үлэлии сылдьар дьон ыалдьыттаатылар.
«Ньурба оройуона» МО баһылыгын бастакы солбуйааччы Иннокентий Васильев ыалдьыттары эҕэрдэлээтэ итиэннэ дохсун ытыс тыаһыгар доҕуһуоллатан оройуон социальнай-экономическай сайдыытыгар кылааттарын киллэрсибит дьоҥҥо анал бэлиэлэри, грамоталары, махтал суруктары туттарда.
Бэлиэ күнү тэрийбит Ньурбатааҕы «Биисинэс-инкубатор» генеральнай дириэктэрэ Ньургуйаана Михайлова олох-дьаһах, өҥөнү оҥоруу эйгэтигэр үлэлээбит дьону эдэр предпринимателлэргэ сүбэ-ама буолалларыгар, санаа атастаһа кэлэллэригэр ыҥырда. Билигин үлэлии сылдьар урбаанньыттарга өрөспүүбүлүкэ, улуус көрөр субсидияларын, чэпчэтиилээх кредиттэрин туһунан сырдатта.
Үрдүк таһымнаахтык тэрээһинтэн ыалдьыттар улаханнык астынан тарҕастылар.
* * *
Ньурба оройуонугар промкомбинат аан маҥнай 1940 сыллаахха тэриллибит. Мастарыскыайдар аһылланнар нэһилиэнньэҕэ таҥас-сап, атах таҥаһын тигэр, хаартыскаҕа түһэрэр буолбуттар. Онтон 1966 сылтан 63 үлэһиттээх олох-дьаһах комбината үлэлээбит. Үлэ-хамнас сайдан, кэҥээн нэһилиэнньэ аайы сыыйа пууннар баар буолуталаабыттар. Тигинэччи үлэлии олорбут кэмбинээт 1990-с сылларга, ырыынакка киирии саҕаланан, «Уран», «Эрэл» ХЭУо, парикмахерскайга арахсыбыт.