Абый орто оскуолатын оҕолоро нэһилиэк тэрилтэлэрин кытта сибээһи ыкса тутан үлэлииллэрэ үтүө үгэскэ кубулуйда. Үөрэнээччилэр тэрилтэ үлэтигэр кыахтарынан көмөлөһөллөр. Онтон улахан дьон араас тэрээһиннэргэ кытталлар, спонсордыыллар. Ити барыта оҕо общественнай интэриэһэ үрдүүрүгэр, үлэҕэ эппиэтинэстээх буоларга, дьону кытта сиэрдээхтик алтыһарга үөрэтэр, иитэр.
Ол курдук, кылаас уонна тэрилтэ кыттыылаах Олоҥхо национальнай күнэ сүрдээх тэрээһиннээхтик, бүтүн нэһилиэнньэ кыттыылаах ааста. Бу күн кулууп фойетыгар оҕолор олоҥхо ис хоһоонун арыйан уруһуйдаабыт хартыыналара, араас оонньуулара дьон болҕомтотугар таҕыста.
Аар саарга аатырбыт «Дьулуруйар Ньургун Боотур» олоҥхобутуттан быһа тардыылары нэһилиэк олохтоохторо астына көрдүлэр. Оскуоланы бүтэрээччилэр олохтоох дьаһалта үлэһиттэрин кытта орто дойду айыллыытын сырдаттылар. Оскуола кэллэктиибэ орто дойду иччилэрин итэҕэтиилээхтик көрдөрөн хайҕанна. Салгыы сэттис кылаас үөрэнээччилэрэ олох-дьаһах коммунальнай хаһаайыстыбатын кытта бухатыыр тас көрүҥүн, төрдүстэр бухатыыр атын, онустар детсад кэллэктиибин кытта олоҥхо дойдутун кэрэ кыыһын, олохтоох култуура тэрилтэтэ үһүстэри кытта абааһы аймаҕын, уот-күөс ситимин (электростанция) үлэһиттэрэ бэһистэри кытта бухатыырдар охсуһууларын, Бальчиновтар фермермскэй хаһаайыстыбалара 8-с кылаас оҕолорун кытта олоҥхо дойдутун аһын-үөлүн көрдөрөн дьоннорун-сэргэлэрин үөртүлэр. Бэтэрээннэр олоҥхо алгыһын, тойугун сырдаттылар.
Дьүүллүүр сүбэ быһаарыытынан «Олоҥхо бухатыырын дьиэтэ» кыайда. Маныаха балыыһа кэллэктиибэ 9-с кылаас оҕолорун кытта элбэхтэ көрсөн, былаан оҥостон, саха балаҕанын малын-салын мунньан, бэриллибит тиэмэтин толору арыйан улаханнык биһирэннэ, хайҕанна.
Ити курдук, бу күннэргэ баай фантазиялаах олоҥхобут омуннаах-төлөннөөх уус-уран тылын-өһүн улаханныын-кыралыын астына аахтыбыт, интэриэһинэй туруоруулары сэргээн көрдүбүт. Сахалыы сайбаччы таҥнан Олоҥхобут күнүн бэлиэтээтибит. Итиэннэ тэрилтэлэр оскуоланы кытта сибээһи ыкса туталлара, тиһиктээхтик, былааннаахтык үлэлэһэллэрэ чахчы да улахан көмө, тирэх буоларын бэлиэтээтибит.