«Пластмастердар» саҥа сыахха киирдилэр

105

Иван Холмогоров салайааччылаах «Пластмастер» оҥорон таһаарар сыах Майа киинигэр Дьоруой Ф.К.Попов аатынан уулуссаҕа саҥа эбийиэккэ киирэр үөрүүлээх тэрээһинэ буолла. Малааһыҥҥа СӨ инвестиционнай сайдыыга уонна предпринимательствоҕа миниистирэ Антон Сафронов ыалдьыттаата.


Майаҕа иккис сылын үлэлиир «Пластмастер» бу иннинэ анал үлэлиир миэстэтэ суох икки буоксалаах гараас дьиэтигэр үлэлии олорбуттара. Ол да буоллар дьон-сэргэ биһирэбилин ылан, элбэх сакаастары толорууга ыччаттар таһаарыылаахтык үлэлээтилэр.

‒ Билигин дуогабарынан үлэһиттэри аахтахха үһүөбүт. Улууска бэйэ оҥорон таһаарыы сылын чэрчитинэн быйыл 7‒8 киһи буолан үлэлиир соруктаахпыт. Сыахпыт уһаайбата 300 кв.м иэннээх, тимир каркаастаах, сэндвич-панель диэн матырыйаалынан тутуллубут эбийиэкпит 144 кв.м иэннээх. Элбэх саҥа ыстаныактары ылбыт буоламмыт сөрү-сөп буолла, кыараҕаһа суох. Инникитин үлэлиир миэстэни кэҥэттинэр кыахтаахпыт. Бырайыагын бэйэбит оҥорбуппут уонна 2017 сыл сааһыгар биригээдэ наймылаһан тимир каркаастарын туруортарбыппыт, аныгы матырыйаалынан бүрүйүүнү үбү-харчыны халтай ыыппат сыалтан бэйэбит оҥордубут. 2016 сылга «Саҥа саҕалааччы предприниматель» бырагыраамаҕа киирсибиппит уонна ол үбүнэн бастакы ыстаныактарбытын ылбыппыт, өрөспүүбүлүкэ, улуус ыытар куонкурустарыгар, бырайыактарыгар инникитин даҕаны кыттыахпыт. Сүрүннээн дьиэ, болкуон түннүктэрин уонна дьиэ үрдүлэрин оҥоруу хайысхатынан дьарыктанабыт. Быйыл былаастыктан уу кутар улахан буочукуларын оҥорууну баһылыахпыт этэ диэн былааннаахпыт, ‒ диэн эдэр үлэһит Иван Холмогоров кэпсиир.

Аалай лиэнтэни кырыйар өрө көтөҕүллүүлээх түгэн кэнниттэн улууска, өрөспүүбүлүкэҕэ киэҥник биллэр олоҥхоһут, алгысчыт Петр Тихонов аал уоту оттон алгыстаан амалыйда. Иван Холмогоров ыалдьыттарга сыахха хайдах үлэлииллэрин кэрийэ сылдьан билиһиннэрдэ, саҥа тэриллэр кыамталарын сырдатта.

Миниистир Антон Сафронов эҕэрдэ тылын эттэ:

Иван курдук туһунан идеялаах, технологиялары өйдүүр ыччаттар маннык курдук эбийиэктэри үлэлэтэллэрэ өрөспүүбүлүкэҕэ атын эдэр дьоҥҥо үтүө холобур буолар. Төһөнөн биһиэхэ маннык элбэх ыччат баар буолар даҕаны, өрөспүүбүлүкэбит соччонон сайдан иһиэхтээх. Саха ыччата олус кыахтаах, дьаныардаах. Мэҥэ Хаҥалас улууһугар, сүрүннээн тырааныспар ситиминэн ааҕыллар Аллараа Бэстээххэ, Майа сэлиэнньэтигэр киин сирдэр буоланнар өрөспүүбүлүкэ өртүттэн ордук болҕомтобутун уурар буолуохпут. Икки сыл устата үчүгэйдик үлэлээн көрдөрбүт Иван хамаандатыгар махталбын тиэрдэбин.

Улуус баһылыгын экономическай сайдыыга уонна инбэстииссийэ бэлиитикэтигэр солбуйааччы Владимир Птицын улууска иккис сылын олохтоох бэйэ оҥорон таһаарыы сылын биллэрдибит, онуоха баҕалаах уолаттарбытын үлэлэтэргэ бырайыактыыр офис аһан үлэлэппиппит, ыччаттары өйүүргэ төһө да үп-харчы аанньа тиийбэтин үрдүнэн, быыс-хайаҕас булан көмөлөһөбүт диэтэ уонна өссө да таһаарыылаахтык үлэлииллэригэр баҕа санаатын эттэ.

«Пластмастер» сыах үлэһиттэрэ хаачыстыбалаахтык уонна тутатына кэмигэр үлэлииллэринэн дьон-сэргэ махталын ылыан ылаллар диэн «Майа сэлиэнньэтэ» МТ баһылыга Дмитрий Тихонов эттэ.

‒ Майабыт киинэ өссө үчүгэй көстүүлээх буоллун, үлэ миэстэтэ таҕыстын диэн санаанан салайтаран, куонкурус биллэрбиппит түмүгүнэн Иваннаах кыайаннар, өр сылларга эргэ самналлан турбут уруккута социальнай страхование дьиэтин көтүрэн, үчүгэй эбийиэги туттулар. Сэлиэнньэбит ыччаттара үлэлээх-хамнастаах буоларга дьулуһаллар. Холобур, эргэ типография дьиэтигэр «Алаас» диэн миэбэл оҥорор сыаҕы аһан үлэлэтэр уолаттар бааллар, ону сэргэ сотору урукку «РЭС» оҕо саадын дьиэтигэр бытовой кэмбинээт оҥорор, В.П.Ларионов аатынан Майа орто оскуолатын бырайыагынан кыһыннары үлэлиир тэпилииссэни үлэлэтэр былааннар бааллар, ‒ диэн кини кэпсээтэ.

Бу кэнниттэн миниистир Антон Сафронов Аллараа Бэстээххэ Николай Скрябин салайааччылаах соторутааҕыта аһыллыбыт биисинэс инкубаторга сылдьан резиденнэри кытта көрсөн, ирэ-хоро кэпсэттэ, санааларын иһиттэ.