Полицейскай Тымныы Мооруос оҕолорго ыалдьыттаата

362

«Полицейскай Тымныы Мооруос» диэн Арассыыйа үрдүнэн тэриллибит аахсыйаҕа Сунтаар улууһа мэлдьи кыттар.


Ол курдук, Сунтаардааҕы Ис дьыала министиэристибэтин отдела 2016 сыл ахсынньы 23 күнүттэн 2017 сыл тохсунньу 15 күнүгэр диэри улуус кыһалҕалаах, кыаммат араҥа ыал оҕолоругар уонна Тойбохойдооҕу оҕо киинин иитиллээччилэригэр Саҥа дьыллааҕы бэлэхтэри оҥордо. Санатан эттэххэ, Сунтаардааҕы ИДьМ отдела Тойбохойдооҕу оҕо киинин кытары ыкса алтыһан үлэлэспитэ ыраатта. Үлэни ситимнээн, тэрилтэ оҕо киинигэр попечитель буолар. Тэрээһин сыала-соруга – оҕо аймах буруйу оҥорботун, сокуону кэспэтин туһугар өйдөтөр-сүбэлиир, сырдатар-билиһиннэрэр үлэни тиһиктээхтик тэрийии уонна оҕо эппиэтинэһин үрдэтии.

Күүтүүлээх бырааһынньыгы көрсө, полиция сотрудниктара оҕолору кытта профилактическай үлэ ыыттыллар итиэннэ Саҥа дьыллааҕы бэлэхтэри туттардылар. Маннык истиҥ көрсүһүүттэн оҕолор барахсаттар үөрүүлэрэ муҥура суох. Итини сэргэ, Сунтаардааҕы сокуоннай саастарын туола илик оҕолору реабилитациялыыр «Кэскил» киинин үлэһиттэрин кытары ПДН иниспиэктэрдэрэ кыһалҕалаах, кыаммат ыал оҕолоругар анаан эмиэ сэмэй бэлэхтэри туттардылар.

Сунтаардааҕы ИДьМ отделын үлэһиттэрин, бэтэрээннэрин оҕолоругар, ону сэргэ отделга үлэлии сылдьан суорума суолламмыт сотрудниктар оҕолоругар полицейскай Тымныы Мооруос эмиэ бэлэхтэрин умнубата.