Үөһээ Бүлүү улууһун киинигэр, «Үс Хоһуун» стадионугар сыыдам сырыылаах, туохтан да толлубат, хоһуун, үөрүү-көтүү көтөллөөх бөрө талисманнаах XX-с төгүлүн ыытыллар спорт национальнай көрүҥнэригэр «Манчаары Оонньуулара» спартакиада өрө көтөҕүллүүлээхтик аһылынна. Манна параад кэмигэр таатталар ааттара эмиэ дохсуннук ааттанна.
Спартакиадаҕа өрөспүүбүлүкэ 37 улууүуттан, ХИФУ-тан, орто анал үөрэх тэрилтэлэрин устудьуоннарын холбоһуктаах союзтарыттан, ол иһигэр Таатта улууһуттан, кыайыыга дьулуурдаах хамаандалар күөн көрсүһэ кэлбиттэр.
Манчаары дойдутуттан саҕыллыбыт спартакиада символическай уотун арыаллаан илдьэ кэлбит бөлөххө биһиги күөн туттар киһибит, Уолбаттан сүүрүк Василий Попов кыттыыны ылла.
Онтон Ытык Күөл 1 №-дээх орто оскуолатын учуутала, хапсаҕайдьыт Роман Уйгуров уоту уматыы эстафетатыгар сүүрдэ.
Оонньуу өрөгөйдөөх былааҕын таһаарыыга мас тардыһыытыгар спорт маастара, Баайаҕа кыыһа Туйаара Орлова баар.
Биһиги биир дойдулаахтарбыт маннык улахан түһүлгэҕэ бастыҥнар ортолоругар киирсэн, кыттыыны ылбыттарыттан олус диэн үөрдүбүт, долгуйдубут, киэн тутуннубут.