Томпотооҕу тыа хаһаайыстыбатын управлениетын иһитиннэриитинэн 2016 сыл уон ыйын түмүгүнэн табаны иитии былаана 100,45% тэҥнэстэ.
Оройуон үрдүнэн алтынньы 1 күнүнээҕи туругунан 9210 таба ахсаана ааҕыллыбыт. Ол курдук, «Томпо» ТХПК (факторияҕа) 7988 таба, П.Е. Погодаев аатынан родовой общинаҕа 913, М.С. Лебедев аатынан родовой общинаҕа 264, бааһынай хаһаайыстыбаҕа 45 таба. Тугут ахсаана 2237 тиийбит. 2017 сыл былаана – 8513 таба.
«Томпо» ТХПК (ф.) уон ыстаадалааҕыттан Вениамин Баишев биригэдьиирдээх 1 №-дээх ыстаада бастыҥ көрдөрүүлээх. 10 ый түмүгүнэн уопсай таба ахсаана 1682, 396 тугуттаах. Бөрө 102 төбөнү тардыбыт, 52 сүппүт, 2 — охтубут. Табаны тутан хаалыыга бэрт кыранан 5 №-дээх ыстаада (биригэдьиир Евгений Погодаев) хаалан иһэр. Бу ыстаадаҕа уопсайа 277 табалаахтар. Онтон Дмитрий Стручков биригэдьиирдээх 4 №-дээх ыстаадаҕа тугут төрөөһүнэ үчүгэй – 61,5%. Манна уопсай төбө ахсаана 754 таба.
Күһүҥҥү хараал үлэтин туһунан Томпотооҕу тыа хаһаайыстыбатын управлениетын начаалынньыга Егор Андросов иһитиннэрбитинэн, графикка олоҕуран табалары күһүҥҥү харааллааһын алтынньы 15 күнүттэн сэтинньи 30 күнүгэр диэри ыытыллар. Онтон хаһаайыстыбалар салайааччылара ахсынньы 7 күнүгэр диэри, оройуон бэтэринээринэй сулууспатын уонна Томпотооҕу тыа хаһаайыстыбатын управлениетын ирдэбиллэригэр олоҕуран, харааллааһын түмүктэринэн аакталарын киллэриэхтээхтэр.
—Күһүҥҥү-кыһыҥҥы кэмҥэ таба иитиитинэн дьарыктанар ыстаадалар маршруттарын былааннара бигэргэтилиннэ. Кыһыҥҥы көһүү маршруттарынан оттук маһын бэлэмнээһин, аһылыгынан, анал таҥаһынан, туттар тээбириннэринэн уонна ГСМ хааччыйыы графиктара оҥоһулунна. Таба иитиитинэн дьарыктанар ыстаадаларга, биригээдэлэргэ уонна хаһаайыстыбаларга 2016-2017 сс. кыстыкка үлэ соруктара уонна 2017 сыл былааннара (тугут дьыалабыай тахсыыта, улахан табаны тыыннаах иитии, төбө ахсаанын элбэтии) бигэргэтиллиэхтэрэ уонна тиэрдиллиэхтэрэ, — диэтэ.
Салгыы харааллааһын үлэтинэн түмүк таһаарыллыахтааҕын, онон сиһилии ырытыы ыытыллыахтааҕын, бастыҥнары наҕараадалааһын буолуохтааҕын уонна хаһаайыстыба, нэһилиэк, оройуон таһымыгар таба иитиитин сайыннарыыга этиилэри дьүүллэһиэхтээхтэрин эттэ.