Булуҥ улууһун Тиксиитигэр атах таҥаһын тигиитинэн дьарыктанар маастар Ефрем Дохов олохтоохтор биһирэбиллэрин ылла. Кини нэһилиэнньэҕэ өҥөнү оҥорууга саҥа салааны арыйда.
Ефрем Дохов таба тыһын имитэн, атах таҥаһын тигэн, улларан биэрэр. Сакааһы Тиксии эрэ иһиттэн буолбакка, Үөһээ Бүлүүттэн, Дьокуускайтан, атын да киин улуустартан тиийэ ылар. Маастар эбии саас, сайын кэтиллэр атах таҥаһын — натуральнай тирииттэн эр дьон, дьахтар, оҕо саппыкыларын, бачыыҥкаларын — тигиини аҕыйах кэм иһигэр баһылаабыт.
«Сыл саҥатыгар улууска өҥөнү оҥорууга көрүллүбүт куонкуруска кыттан, кыайан, үп көрбүттэрэ. Онон иис матырыйаалын: тириини, саппыкы, бачыыҥка уллуҥар наадалаах хаачыстыбалаах микрофора резинаны атыылаһан аҕалбытым. Интернеттан көрөн модельнай атах таҥас хайдах моһуоннаах кырылларын, тигиллэрин үөрэппитим, онтон тигэн барбытым. Үлэбин олус сөбүлүүбүн», — диэн кэпсиир кини.
Олунньу ыйыттан элбэх сайыҥҥы атах таҥаһыгар сакаас киирбит. Маҥаһыыҥҥа атыыланар атах таҥаһыттан хаалсыбат хаачыстыбалаах диэн дьон сэҥээрбит. Атах таҥаһын оҥороругар сон замогун тигэр биир, икки таҥас тигэр массыналардаах, таҥас сууйтарар массыына мотуоруттан бэйэтэ айбыт, атах таҥаһын уллуҥнарын тэҥниир тэриллээх.
Ефрем оҥорон таһаарар бородууксуйатыттан киирбит үбүнэн эбии тириини тигэр анал уонна пресстиир массыыналары ылар былааннаах.