Өймөкөөн улууһун II Бороҕон нэһилиэгин дьаһалтата Суолга куттал суох буолуутун инспекциятын кытта ыкса үлэлээтэ. Холбоһуктаах дьаһал чэрчитинэн суолга бэлиэлэр туруорулуннулар.
Балтараа тыһыынчаттан тахса киһи олорор Томтор сэлиэнньэтигэр 60-ча суол бэлиэтэ турда. Улахан оскуола, оҕо саада баар сиригэр маннык бэлиэлэри туруоруу көмөлөөҕө чахчы.
Олохтоох дьаһалта бэйэтин бүддьүөтүгэр үп көрөн, Дьокуускайга анал бэлиэлэри сакаастаабыт. Баһылыгы солбуйааччы Екатерина Винокурова этэринэн, “Дорстрой” ХЭТ кэлэн бэлиэлэри туруорбут. «Сэлиэнньэ иһигэр суол бэлиэтэ туруута тиэхиньикэлээх дьону бэрээдэктээтэ, оҕолорго суолга сэрэхтээхтик сылдьыыга интэриэһи үөскэттэ», — диир кини.
Суол бэлиэлэрин туруоруу дэриэбинэ ис өттө тупсаҕай буоларыгар олук буолбутун олохтоохтор бэлиэтииллэр. «Бу Тупсарыныы сылын биир үтүө көстүүтэ«, — диэн санааларын эттилэр.