Өлүөхүмэ улууһун Улахан Муҥку нэһилиэгэ СӨ олох-дьаһах коммунальнай хаһаайыстыба уонна энергетика министиэристибэтэ нэһилиэнньэлээх пууннары тупсарыы дьаһалларын толорууга анаан сыл саҥатыгар ыыппыт куонкуруһугар кыттан субсидияҕа тиксибитэ. Тустаах үп нэһилиэги тупсарыыга туһуланан, үлэ-хамнас тиһиктээхтик салҕанарын туһунан нэһилиэк баһылыга Оксана Саввинова иһитиннэрэр.
Улахан Муҥкуга суолу-ииһи тупсарыыга, нэһилиэк иһин сэргэхситиигэ улахан үлэ барда. «Уулуссаларбытын өрөмүөннээһиҥҥэ уопсайа 2,5 мөлүйүөннээх үлэ ыытылынна. Кумах, буор, гравий кутулунна. Отут алта суол бэлиэтэ туруорулунна. Светодиоднай лаампаларынан уулуссалар сырдатылыннылар. Мас тротуарданныбыт. Сааскы халааны, сайыҥҥы ардаҕы этэҥҥэ аһарар инниттэн, уу хаайтарар сирдэригэр турбалар таттарылыннылар. Эргэ хочуолунай дьиэтин көтүрэн, миэстэтэ ыраастанна, — диир баһылык Оксана Саввинова.
Үлэ итинэн түмүктэммэт. Нэһилиэк киинигэр, быйыл күрүөлээбит культурнай-спортивнай комплекстарын тиэргэнигэр бэртээхэй оҕо былаһаакката бу ыйга аһыллыахтаах. Оксана Николаевна иһитиннэрэринэн, норуот маастара Архип Павлов киһи эрэ кэрэхсиир, сэргиир былаһааккатын дьэндэппит. Манна хачыал арааһа, остуоруйа дьиэтэ, беседка, сырылыыр сир, о.д.а. остуоруйа, мульткиинэ дьоруойдарынан, оһуорунан-мандарынан киэргэтиллибиттэр.
Олохтоохтор доруобуйаларын тупсарыналларыгар, ыччат түмсэн спордунан дьарыктанарыгар анаан предприниматель Альберт Габышев киэҥ-куоҥ былаһаакканы тута сылдьар. Былаан быһыытынан үрдүк күрүөлэниэхтээх-хаһааланыахтаах. Бэртээхэй тутууттан эдэрдэр улаханнык астыналларын, үөрэллэрин биллэрбиттэр.
Оксана Николаевна үлэ-хамнас туһунан элбэҕи сырдатта. Маныаха кини тыа сирин сайыннарыыга туһуламмыт үлэ дьон-сэргэ санаатын улаханнык көтөҕөрүн, бөҕөргөтөрүн бэлиэтиир. Олохтоохтор дьиэлэрин-уоттарын, тиэргэннэрин тупсаран иһэллэрэ харахха быраҕылларын, сайынын үүнээйи арааһын олордооччу элбээбитин, күрэхтэһиилэргэ, куонкурустарга ыччат көхтөөхтүк кыттарын киэн тутта этэр. «Нэһилиэкпит сайдыыта – кэскилбит дьылҕата. Итинэн салайтаран тыа сирин дьоно олоҕу-дьаһаҕы тупсарарга сорунуулаахтык ылсабыт», — диир кини.