Бу сайын Дьохсоҕоҥҥо араас үөрэх кыһаларыгар үөрэнэр эдэр дьон тутар этэрээт тэринэн үлэлии сылдьаллар. Оҕолор төрөөбүт нэһилиэктэрин тупсараллар. Байыастар сайыҥҥы сынньалаҥнарын туһалаахтык атаара сылдьалларынан киэн тутталлар.
Этэрээт от ыйын 3 күнүттэн үлэтин саҕалаабыта. Биир ый устата оҕолор төрөөбүт дэриэбинэлэрин тупсарыыга үлэлиэхтэрэ. Байыастар уопсайа сүүрбэлэр: 10 кыыс, 10 уол. Хамандыыр ХИФУ биология салаатын устудьуона Дима Тистяхов уонна кини көмөлөһөөччүтэ, хамыһаар, юридическай колледж устудьуона Аня Павлова доҕотторун түмэннэр, бары биир киһи курдук тэҥинэн туруммуттар. Санатар эбит буоллахха, былырыын сайын Дьохсоҕоҥҥо ХИФУ тутар этэрээтин оҕолоро кэлэн сайын устата үлэлээбиттэрэ.
Оҕолор күн аайы сарсыарда 9 чаастан саҕалаан киэһэ 6 чааска диэри дэриэбинэ иһин ыраастыыллар, суол кытыытыгар ыһылла сытар бөҕү-саҕы хомуйаллар. Эбиэккэ эрэ тохтоон, сынньанан ылаллар.
Быйыл Дьохсоҕон пааркатыгар тупсарыы үлэтэ күүстээхтик барда. Ол курдук, ыһыах иннинэ улахан өрөмүөн ыытыллан, күн уотуттан хаххалаах саҥа трибуна, сыана тутуллубута, эрчиллэр тренажердар туруоруллубуттара. Онон, биир тылынан эттэххэ, паарка дьон-сэргэ астына-дуоһуйа сынньанар, үөрэ-көтө мустар сирэ буолан турар. Маныаха этэрээт оҕолоро күрүө кырааскалаан, паарка иһигэр быраҕыллыбыт бөҕү хомуйан, ойууругар сууллубут мастары эрбээн, тиэйэн, быраҕан, өҥөлөрө улахан. Үлэҕэ туттуллар инструменнарын оҕолор бэйэлэрэ илдьэ кэлэллэр, оттон бензин, сэлээркэ көрүллэр.
Эдэрдэр сыралаах үлэлэрин биир дойдулаахтара хайҕыы көрөллөр. Дэриэбинэ иһэ-таһа, мэктиэтигэр от ордук көҕөрбүккэ дылы буолбут дэһэллэр.