Киинэ сылын тэрийэр улуустааҕы хамыыһыйа ахсынньы саҥатыгар Түүлээх нэһилиэгэр сырытта. Россия үрдүнэн биллэриллибит тэрээһин улуус бары кэриэтэ нэһилиэктэрин хабан ыытылынна. Кылаайыга даҕаны, ханна да буоларыныы, дьон-сэргэ олус көхтөөхтүк кытынна.
Киинэни урут кулуупка, киинэ тыйаатырыгар көрбүт дьон, билигин сааһырбыт көлүөнэҕэ киирсэн оҕо саастарын, эдэр кэмнэрин умсулҕаннаах, умнуллубат сылларын быһыытынан аҕыннылар. Оччотооҕуга сааланы толору көрөөччүнү мунньар Индия киинэлэрэ өйтөн-сүрэхтэн сүппэттэрин санатыстылар, эдэр ыччакка кэпсээтилэр.
Тэрээһин чэрчитинэн «Киинэ – биһиги олохпутугар» аахсыйа ыытылынна. Манна олохтоохтор 13500 солк. киллэрдилэр. Бу үп улуус киинэтин туһунан кинигэ күн сирин көрөрүгэр, Киинэ сылын түмүктүүр тэрээһиҥҥэ аналлаах буклеттар, өйдөбүнньүктэр тахсалларыгар ананыа. Нэһилиэк олохтоохторун улуус бастыҥ ырыаһыттара Л.Протопопова, Т.Румянцева, И.Карпов, В.Егоров истиҥ иэйиилээх ырыаларынан эҕэрдэлээтилэр. Тэрээһин иккис чааһа улуус киинэтин бэтэрээнэ Н.Н.Тарскайга ананна.