Таатта улууһун киин бөһүөлэгэ Ытык Күөл Куула түөлбэтигэр үөрүүлээх түгэн от ыйын 24 күнүгэр буолла. Куулаҕа улууска бастакынан аныгылыы тэриллиилээх, тутуулаах саҥа 1,5 Мвт кыамталаах КВР хочуолунай акылаата түһэрилиннэ.
Хочуолу «Юпитер» ХЭТ дириэктэрэ, биир дойдулаахпыт, Чөркөөхтөн төрүттээх Тарас Жегусов тутар. Бу тэрилтэ өссө 2015 сыллаахха Мэҥэ Хаҥалас улууһун Матта сэлиэнньэтигэр 20-чэ ыалга, култуура-спорт комплексыгар, баһаарынай чааска маннык хочуолунайы тутан киллэрбит.
2016 сыл ахсынньытыгар Таатта нэһилиэгин депутаттарын Сэбиэтин бэрэссэдээтэлэ, саҥалыы хамсааһыны өйүүр инициатор, түөлбэҕэ ыаллар олорор сирдэригэр кииннэммит ититиини бырайыактааһыны көҕүлээччи, экспертизаны ыытааччы, тутууну түөлбэҕэ сүрүннээччи А.И.Шарин салайааччылаах дэлэгээссийэ Маттанан, атын да сирдэринэн сылдьан үлэни көрөн, билсэн кэлбиттэрэ. Оччолорго маннык хочуол итиитинэн туһанар ыаллар, тэрилтэлэр сылаастык олороллорун илэ харахтарынан көрөн кэлэн, түөлбэ олохтоохторугар кэпсээбиттэрэ. Күн бүгүн Куула түөлбэҕэ 70-ча ыал итиини киллэрии ситимигэр холбонор баҕаларын биллэрэн, харчыларын төлөөн олороллор. Холбонор ыал ахсаана 100-н итэҕэһэ суох буоллаҕына тутуу түргэтиэхтээх, хочуол толору кыаҕынан үлэлиэхтээх.
Александр Иннокентьевич кэпсииринэн, «Юпитер» ХЭТ маннык хочуоллары билигин Балыктаахха, Хаҥалас улууһун 1-кы Дьөппөнүгэр акылааттарын түһэрэн тута сылдьаллар. Дьөппөҥҥө улахан кыамталаах квартальнай хочуолга ыаллар, тэрилтэлэр, оҕо саада, культура дьиэтэ, о.д.а. холбонуохтаахтар. Хочуолу туруорсууга, олохтоохтору пропагандалааһыҥҥа, тиэйэр-таһар, тэрийэр үлэҕэ күнүн-дьылын, тус ороскуоттарын аахсыбакка үлэлэспит түөлбэ олохтооҕор А.Е. Ноеноховка улахан махталын биллэрдэ.
Билигин Куула түөлбэтин Гагарин, Макаров, Сунхалыров уулуссаларын ыаллара бастакы түһүмэххэ киирсэн холбоноллоругар үлэ барар. Онтон салгыы бу хочуол оннун буллаҕына, иккис түһүмэххэ Чараҥ уулуссатын ыаллара эбии холбонуохтаахтар. Түөлбэҕэ социальнай объектар суохтар. Кэлин кииннэммит ититии сүнньүн буллаҕына бу эҥэргэ кураанах турар дьиэлээх уһаайбаларга, ананан турар, сайаапкаламмыт микрооройуоннарга саҥа ыаллар олохсуйа кэлэллэригэр, дьон-сэргэ эбиллэригэр эрэллээҕин биллэрдэ.
Акылаат түһэриитин үөрүүлээх тэрээһинигэр «Таатта улууһа» МО баһылыгын экономикаҕа солбуйааччы И.И.Потапов, Таатта нэһилиэгин баһылыга Е.И.Павлов, уокурук улууска депутата А.Уваров, нэһилиэк депутата Е.Е.Ноенохов, тутар биригээдэ, сүргэлэрэ көтөҕүллүбүт түөлбэ олохтоохторо кыттыыны ыллылар. Тэрээһини түөлбэ уопсастыбаннай салайааччыта, бу туһугар ис сүрэҕиттэн, өйүнэн-санаатынан үлэлиир А.М.Савватеева салайан ыытта.
Тэрээһиҥҥэ И.И.Потапов, Е.И.Павлов, А.И.Шарин, Т.И.Жегусов, олохтоохтор ааттарыттан элбэх оҕолоох, сиэннэрдээх Р.Е.Терякова эҕэрдэ, махтал тылларын эттилэр. Иван Иванович, Егор Иннокентьевич уонна Александр Иннокентьевич этиилэригэр олохтоохтор, нэһилиэк, улуус дьаһалталара холбоһон тутуу төлөбүрүн кэмигэр оҥороллоруттан бу кэскиллээх хочуол түргэнник тутуллан бүтэригэр эрэллээхтэрин, атын да түөлбэлэргэ маннык тутуу харгыһа суох ыытыллыан сөбүгэр санааларын эттилэр.
Розалия Егоровна этиитигэр бу күн кинилэр дьиэ кэргэҥҥэ бэлиэ күн буолбутун иһитиннэрдэ. Ол курдук, Теряковтар кииннэммит ититии киирэринэн дьиэлэрин акылаатын уларыппыттара бу күн бүтэн, хочуол акылаата түһэн, икки төгүл үөрүүлээх буолбутун астынан туран эттэ. Онон, олохтоохтор төһө кыалларынан итиини киллэриигэ харчыларын төлөһөллөрүгэр ыҥырда, тутуу биригээдэтигэр, Тарас Ивановичка саҕалаабыттара салҕанан, тутуу харгыһа суох ыытыллан, эһиил баччаҕа бука бары кииннэммит хочуолга холбонорго үтүө баҕа санаатын эттэ, нэһилиэк салалтатыгар, депутаттарга махталын биллэрдэ.
Үөрүүгэ холбоһон үүнэр көлүөнэ аатыттан Теряковтар сиэн кыргыттара Айыына уонна Саина Сыромятниковалар хомустаан дьүрүһүттүлэр. Түөлбэ көхтөөх дьоно Мария Дмитриевна Матаннанова дьэдьэннээх сүөгэйинэн, сылаас алаадьынан, Евдокия Михайловна Михайлова анаан астаабыт арыылаах саламаатынан хочуолунай үлэһиттэрэ, үөрүүлээх түгэн кыттыылаахтара айах тутулуннулар.