18.15 Хомойуох иьин бу күн уолаттарбытыттан ким да финалга тахсыбата. Оттон Александр Богомоевка хотторбут бөҕөстөр үһүс миэстэни былдьаһар бөлөхтөрүгэр бастаан Николай Охлопков уонна дагестанец Бадрутдинов көрүстүлэр. Бу хапсыһыыга биһиги уолбут 2:2 ахсаанынан, хаачыстыбанан хотторон кэбистэ. Чочумча буолаат аны Бадрутдиновка Владимир Флегонтов таҕыста. Сүрдээх тыҥааһыннаах киирсиигэ сөптөөх тактиканы тутуһан, Владимир 6:1 ахсаанынан хотон, турнир боруонса мэтээлин былдьаһар чиэскэ тигистэ. Кини утарсааччыта — дагестанец Гаджимурад Рашидов.
Турниры үөрүүлээхтик аһыыга сүрүн сыанаҕа Красноярскай кыраай правительствотын председателэ Виктор Томенко, Россия спортивнай тустууга федерациятын президенэ Михаил Мамиашвили тахсан эҕэрдэлээтилэр. Россия Гимнэ оонньонно. Турнирга үс сүүсчэкэ спортсмен кыттар. Күнүскү өттүгэр саалаҕа киһи наһаа элбэҕэ суох эбит буоллаҕына, финалларга саала тобус толору. Хамаандалар параадтарыгар АХШ былааҕын тренер да, тустуук даҕаны буолбакка, биһиги биир идэлээхпит — суруналыыс тутан киирбитэ интэриэһинэй буолла.
Үөрүүлээх аһыы кэмигэр СӨ Ил Дарханын көмөлөһөөччүтэ Михаил Эверстов үтүөлээх тренер Д.Г.Миндиашвилига АЛРОСА Махтал суругун туттарда. Турнир комментатора Феликс Премильскай бочуоттаах ыалдьыттары билиһиннэриитин салҕаата. Кини Саха сирин спорка миниистирэ Михаил Гуляевы билиһиннэрэригэр, аны үс ыйынан Дьокуускай Россия көҥүл тустууга чемпионатын тэрийэн ыытыахтааҕын санатта.
Эр дьон тустуохтарын иннинэ дьахталлар туһуннулар. Онуоха быйылгы турнир биир соһуччу түмүгүнэн аан дойду уон, Олимпиада үс төгүллээх чемпиона Каори Ичо (58 кг) финалга Монголия кыыһыгар 0:10 ахсаанынан хотторуута буолла. Комментатор эппитинэн Ичо бу, бэйэтин спорка олоҕор бастакы хотторуута эбит.
Иван Ярыгин аатынан норуоттар икки ардыларынааҕы Гран-при турнир бастакы күнүн бүтэһик быһаарыылаах хапсыһыыларыгар көрсөллөр:
57 кг финал: Александр Богомоев (Россия, Бурятия) — Рустам Ампары (Россия, Москва) кэтэһэн туруута суох хабыр киирсиигэ 5:2 ахсаанынан хотто.
Үһүс миэстэ иһин тустуулар: Владимир Флегонтов (Россия, Саха сирэ) — Гаджимурад Рашидовка (Россия, Дагестан) 1:2 хоттордо. Бу тустууга Флегонтов хайдах эрэ иннинээҕи киирсиилэригэр холоотоххо, тустуутун сытыырхатан биэрбэтэ. Биирдэ даҕаны атахха ыстаммата. Онон бастакы күн мэтээлтэн маттыбыт. Флегонтов бэһис буолла.
Нариман Исрапилов — Артем Гебеков (иккиэн Россия, Дагестан) тустууларыгар кыайыыны Гебеков ситистэ.
74 кг финал: Заур Макиев (Россия, Хотугу Осетия) — Муслим Дадаев (Россия, Чечня).
Үһүс миэстэ иһин: Хабиб Батиров (Россия, Дагестан) — Кахабер Хубежты (Россия, Хотугу Осетия).
Ахмед Гаджимагомедов (Россия, Дагестан) — Эндрю Хоу (АХШ).
Сарсын 61 кг түөрт уолбут: Виктор Лебедев, Ньургун Скрябин, Егор Пономарев, Вячеслав Флегонтов тусталлар. Бу ыйааһыҥҥа барыта 17 бөҕөс кыттар. Лебедев бастакы эргииргэ Имам Аджиев диэн Дагестан эдэр бөҕөһүн кытта тустуоҕа, Пономарев Банзаракцаевтыын көрсүөҕэ, оттон Скрябин уонна Ефремов бэйэ-бэйэлэрин кытта тустар буолбуттар.
Манан бастакы күн сырдатыыны түмүктүүбүт. Болҕомтоҕут иһин махтал!