12.20
Онон 61 киилэҕэ 8/1 Бадмаев — Аджиев, Энхсайхан — Чымба, Муталимов — Пономарев, Скрябин — Чакаев көрсөллөр.
Аджиев буряты кыайан салгыы тустар буолла. Билигин биһиги киниэхэ ыалдьабыт. Тоҕо диэтэххэ, Аджиев финалга тахсар түгэнигэр Виктор Лебедев салгыы тустар кыахтанар.
Егор Пономарев — Муршид Муталимовка 1:3 ахсаанынан хотторон кэбистэ. Манна бөҕөстөр техническэй албаһы оҥорсубатылар. Муталимов биирдэ көбүөр таһыгар таһааран очко ылла. Уоннааҕы очколар сэрэтиинэн бэрилиннилэр.
Ньургун Скрябин — Ахмед Чакаев. Билэргит курдук бу бөҕөстөр былырыын күһүн Казахстаҥҥа, Кунаев бирииһин финалыгар көрсөн тураллар. Онно Чакаев кыахтаахтык кыайбыта. Бу сырыыга дьэ хайдах буолар?
Ньургун хапсыһыы саҕаланыытыгар киһитин бэйэтин сөбүлээн туттар албаһыгар киллэрэн ыраас кыайыыны ситистэ! Саха сирин көрөөччүлэрэ сүрдээҕин үөрдүлэр. Манна даҕатан эттэххэ, ааспыкка Коркин турнирыгар Скрябин ити албаһынан В.Ефремовы кыайан турар. Дьэ, маладьыас. Ньургун сэргэхситтэ. Уолбут аны финал аҥарыгар дагестанец Муталимовтыын көрсөр.
Кэтэһэбит: Аджиев — Чымба, Муталимов — Скрябин.
13.30 Финалга тахсар иһин киирсиилэр: Имам Аджиев (Дагестан) — Кежик Чымба (Красноярскай). Чымба тувинец, маастарга кандидат, сүүрбэ саастаах. Эдэрдэргэ Россия күрэхтэһиитин кыайыылааҕа. Бу иннинэ Чымба монголлар Батсайханы (Азия призера) уонна Энхсайханы (аан дойду призера) кыайталаабыта. Сүрдээх бырахсыылаах киирсиигэ Аджиев 8:5 ахсаанынан хотон иһэр. Судьуйа быһаарыытыгар сөпсөспөккө икки өттүттэн кубик бырахсыылаах, мөккүөрдээх киирсиигэ Аджиев кыайда.Эппитим курдук, биһиэхэ Аджиев кыайара наада этэ. Тоҕо диэтэргит, Виктор Лебедев киниэхэ хотторбутун быһыытынан салгыы тустар кыахтанна.
Ньургун Скрябин — Муршид Муталимовы сүрдээх тыҥааһыннаах киирсиигэ 4:1 ахсаанынан үчүгэйдик кыайда. Бастакынан баалы Муталимов ылбыта, биһиги уолбутун сэрэппиттэрин иһин. Ити курдук, иккис түһүмэххэ көхтөөхтүк үлэлээн, биир түгэҥҥэ атахха киирбит киһини умса тардан кэннигэр тахсан баран, оруобуна Чакаевка туттубут албаһын оҥоро сатаата да кыаллыбата. Туруордулар. Ахсаан 2:1 буолан турдаҕына аны дагестанец хотторон иһэрин билэн, кимиилээхтик туста сатаата. Уолбут үчүгэйдик көмүскэнэр. Ол курдук Муталимов ыксаан үлүбээй түһэ сырыттаҕына эмиэ умса тардан кэннигэр тахсаатын кытта свисток буолла. Кыайыы!!! Саха Өрөспүүбүлүкэтин былааҕа элэҥнэс.
Аны бүтэһик быһаарыылаах киирсиигэ (финалга) Имам Аджиев уонна Ньургун Скрябин көрсүөхтэрэ. Оттон Виктор Лебедев уонна Нь.Скрябиҥҥа хотторбут Вячеслав Ефремов үһүс миэстэни былдьаһааччылар бөлөхтөрүгэр киирдилэр. Онон уолаттарбыт салгыы күрэхтэһэллэр. Бары күүтэбит. Ыалдьабыт.