Иван Ярыгин аатынан норуоттар икки ардыларынааҕы турнир. Иккис күн

295

Үтүө күнүнэн тустууну таптааччылар!

Турнир иккис күнүн сырдатыыны саҕалыыбыт. Бүгүн дьахталларга түөрт, эр дьоҥҥо үс ыйааһын спортсменнара тусталлар. Биһиги болҕомтобут барыта — 61 кг ыйааһын.

IMG_6960Виктор Лебедев — Имам Аджиев (Дагестан). Утарсааччыбытын билиһиннэрэр буоллахха, Аджиев омугунан чечен. Былырыыҥҥы сылы турнирдарга ситиһиилээхтик кыттан түмүктээбитэ. Эдэрдэргэ Европа чемпиона. Тренерэ — Зелимхан Гусейнов. Хапсыһыы хайдах барда?

Бастакы түһүмэх бүтүүтэ Виктор көбүөр таһыгар бырахтарбытын судьуйалар түөрт баалынан сыаналаатылар. Онон бастакы түһүмэх итинник ахсаанынан түмүктэннэ. Иккискэ киирэн Лебедев атахтаан баран тута накаттаан, ахсааны тэҥнээтэ (4:4). Ону сөбүлэспэккэ дагестанецтар кубик бырахпыттарыгар судьуйалар мониторга көрөн үөрэтэн баран ахсааны Лебедев туһатыгар 5:4 оҥордулар. Биһиги дэгдэс гына түстүбүт. Ити курдук сүүрбэччэ сөкүүндэ буолан баран хапсыһыыны салҕаабыттарыгар Аджиев хаптас гынан атахха киирэн охторон, эбии икки баалы сурунна. Бүтэһик сөкүүндэлэргэ Виктор кимэ сатаата да, бириэмэ бүтэн хаалла. Онон 5:6 ахсаанынан хотторон кэбистибит.

DSC_0645+Бу ыйааһыҥҥа аан дойду экс-чемпиона Бекхан Гойгереев бурят Бато Бадмаевка 2:7 ахсаанынан хотторбута. Онон аныгыскы эргииргэ Бадмаев уонна Аджиев көрсөр буоллулар. Уопсайынан, Аджиев финалга тахсар чинчилээх. Оччотугар биһиги Виктор Лебедевпит үһүс миэстэ иһин киирсэр кыахтаах. Онон эрэлбитин сүтэрбэппит.

Егор Пономарев — Виктор Банзаракцаев (Бурятия). Утарсааччыбыт Россия чемпионатыгар призердуу сылдьыбыта, опыттаах, саастаах бөҕөс.

Ньургун Скрябин — Вячеслав Ефремов. Бу бөҕөстөр соторутааҕыта Коркин турнирыгар көрсөн тураллар, онно Скрябин албаска киллэрэн ыраастык кыайбыта.