Иван Ярыгин аатынан норуоттар икки ардыларынааҕы турнир (үһүс күн түмүгэ)

831

13.00 Быһаарыылаах хапсыһыылар чугаһаан эрэллэр.

Сэрэйиллибитин курдук, Магомед Курбаналиев (65 кг) финалга тахсыбытынан, биһиги Виктор Степановпыт үһүс миэстэни былдьаһааччылар бөлөхтөрүгэр киирэн Наранболд Батсууҕу кытта туһунна уонна 11:0 ахсаанынан кыайыыны ситиһэн, боруонса мэтээл иһин эмиэ монгол, аан дойду икки төгүллээх призера, Азия оонньууларын кыайыылааҕа Мандахнаран Ганзоригы кытта тустуоҕа.

DSC_1003+Бу ыйааһыҥҥа иккис киһибит Константин Власов «уоскутар бөлөххө» Алибекгаджи Эмеевкэ 0:8 хоттордо. Онон бу турнирга иккитэ туһунна. Бу эдэр уолга улахан опыт буолуоҕа.

97 кг Евгений Коломиец — Зайнулла Курбанов. Бу эмиэ «санааны уоскутар тустуу». Курбанов былырыын маннык күрэхтэһиигэ иккис миэстэлэммитэ. Сүрдээх тыҥааһыннаахтык барбыт хапсыһыыга Евгений хотторон кэбистэ, онон күрэхтэһииттэн туораата.

Степанов -Ганзориг: уолбут тилэхтээн очкону бастакынан ылла (1:0), наар үөһэттэн илии баайсан туһуннулар. Салгыы тустууга монгол хаптас гынан биһиги уолбут көхсүгэр биирдэ хатана түстэ даҕаны, тиэрэ тардан быраҕан икки очкону сурунна. Ити курдук, монгол опытынан баһыйан, эмтэр эмэн, хапсыһыыны 6:2 ахсаананын бэйэтин туһугар түмүктээтэ.

DSC_1014+Онон үһүс күҥҥэ финалга таҕыстылар: 65 кг Магомед Курбаналиев (Россия, Дагестан) — Исраил Касумов (Россия, Красноярскай), 70 кг Хусейн Суюнчев (Россия) — Заурбек Сидаков (Россия, Хотугу Осетия) уонна 97 кг Анзор Болтукаев (Россия, Чечня) — Джейк Варнер (АХШ).

М.Курбаналиев эчэйиилээх буолан финалга тахсыбата, онон 65 кг ыйааһыҥҥа Исраил Касумов бастаата.

Манан Иван Ярыгин аатынан норуоттар икки ардыларынааҕы Гран-при турниры сайтка сырдатыыны түмүктүүбүт. Барыгытыгар этэҥҥэ буолууну баҕарабыт. Саха сирин хамаандата быйылгы күрэхтэһиигэ биир кыһыл көмүс (Ньургун Скрябин), биир боруонса (Виктор Лебедев) уонна икки бэһис миэстэлээх (Владимир Флегонтов, Виктор Степанов). Бу көрдөрүүнү куһаҕана суоҕунан сыаналыахха сөп.