14.40 Дьэ онон, үһүс миэстэни былдьаһар бөлөххө бастаан Виктор Лебедев бурят Бато Бадмаевтыын тустар. Бу хапсыһыы кыайыылааҕа Кежик Чымбаҕа тахсар уонна турнир боруонса мэтээлин ким ыларын быһаарсыаҕа. Бу бөҕөстөр урут биирдэ көрсөн тураллар. Онно бурят кыайбыта. Бу сырыыга дьэ хайдах буолар? Бастакы үс мүнүүтэҕэ биһиги уолбутугар көҕө суохтук тустар диэн сэрэтии биэрдилэр. Ол аата, Бадмаевка — баал. Иккис түһүмэх эмиэ наҕыл соҕустук саҕаланна. Биир түгэҥҥэ көбүөр таһыгар анньыһыыга Бадмаев сэрэҕин сүтэрбитин туһанан Виктор киһитин көхсүгэр биирдэ баар буола түстэ уонна бэйэтин нөҥүө элээрдэн (прогиб) түөрт баалы биирдэ олордон ылла. Хапсыһыы итинник түмүктэннэ. Көрөөччүлэр Викторга махтаннылар.
Онтон аллараа бөлөххө Вячеслав Ефремов — Ахмед Чакаев кытта тустар. Манна кыайбыт бөҕөс үһүс миэстэ иһин Муталимовтыын тустуоҕа. Бу киирсиигэ Вячеслав төһө да хоттордор (4:10), үчүгэй тустууну көрдөрдө. Ыалдьааччылар ону сөптөөхтүк сыаналаатылар. «Слава, маладьыас!» диэн хайгаатылар.
Онон киэһэ финалга Ньургун Скрябин Имам Аджиевы кытта бастакы, оттон Виктор Лебедев Кежик Чымбаны кытта үһүс миэстэлэри былдьаһаллар. Уолаттарбытыгар ситиһиилэри баҕарабыт.