Быйыл Бороҕоҥҥо бэһис төгүлүн үгэс буолбут ааҕыылар ыытылыннылар. Бу туһунан СИА улуустааҕы оҕо бибилэтиэкэтин сэбиэдиссэйэ Вера Портнягина иһитиннэрдэ.
— Биһиги улууска эбии үөрэхтээһин Киинин кытта үрдүкү кылаас уолаттарыгар маннык ааҕыылары 2008 сылтан ылата тиһиктээхтик тэрийэбит. Быйылгы тэрээһиммит Былатыан Ойуунускай аатынан Саха академическай драматическай тыйаатыр тэриллибитэ 110, улуу бэйиэт Алампа төрөөбүтэ 130 сылларынан «Алампа айбыта барыта» диэн ананан ыытылынна. Манна улуус биэс оскуолатыттан сэттис кылаастан 11 кылааска диэри үөрэнэр уолаттар кытыннылар. Бөлөҕүнэн ааҕыыга түмүккэ Саха-Бельгийскэй гимназия үөрэнээччилэрэ («Алампа олоххо анала», сал. Валентина Бурнашева, Варвара Петухова, Михаил Пухов) кыайыылааҕынан таҕыстылар. Иккискэ Уһун Күөл оскуолатын уоланнара «Миигин тоҕо ыллаппаккын?» (сал. Екатерина Федотова), үһүскэ Мүрү 1 №-дээх оскуолатын үөрэнээччилэрэ «Алампа олох хоһууна» дьүһүйүүлэринэн таҕыстылар. Биирдиилээн ааҕыыга Сергей Нафанаилов (Саха-Бельгийскэй гимназия) бастаата. Сергейгэ Саха тыйаатырыгар икки премьераҕа сылдьарыгар ыҥырыы, кыайыылаахтарга кубоктар, кинигэлэр, мэтээллэр ытыс тыаһыгар арыалланан туттарылыннылар», — диэтэ Вера Алексеевна. Тэрээһиҥҥэ бу куонкуруска кыттаары эрдэттэн сыал-сорук туруорунан бэлэмнэнэр Бороҕон 1 №-дээх оскуолатын 4 «б» кылааһын уолаттарын дьүһүйүүлэрэ (сал. Наталья Портнягина), Саха-Бельгийскэй гимназия учуутала Михаил Пухов Алампа «Үрүҥ туллук эрэ мөлбөстүүр» ырыатын олус иэйиилээхтик ыллааһына саалаҕа мустубут ыалдьыттары улаханнык долгуппуттар. Вера Алексеевна кэнчээри ыччат төрөөбүт төрүт тыл сүмэтин этигэр-хааныгар, өйүгэр-санаатыгар дириҥник иҥэринэн иһэрин, онон куонкурус сыллата сытыырхайарын, сайдарын бэлиэтиир.
Кини маны сэргэ, улуустааҕы оҕону эбии үөрэхтээһин Киинин кытта бииргэ, Саха тыйаатырыгар режиссер көмөлөһөөччүтэ Марианна Федотова көҕүлээһининэн «Тыйаатыр уонна оҕо» бырайыагынан бииргэ үлэлэһэллэрэ улахан көмөлөөҕүн этэр. Былырыын драматург, прозаик Николай Неустроев төрөөбүтэ 120 сылынан Саха тыйаатырын ыҥыран ыалдьыттаппыттар. Тыйаатыр артыыстара оскуолаларга оҕолору кытта ирэ-хоро сэһэргэспиттэрин, нэһилиэнньэҕэ «Тиэтэйбит» комедияны оонньоон көрдөрбүттэрин дьон-сэргэ улаханнык астына саныыр эбит. Бу үлэлэрин чэрчитинэн, быйыл Культура колледжын ыҥырбыттар. Колледж устудьуоннара оҕону эбии үөрэхтээһин Киинигэр саҥа аһыллыбыт «Өркөн» саалаҕа Алампа «Таптал» драматын көрдөрбүттэр, оскуола үөрэнээччилэриниин көрсүбүттэр, маастар-кылаастары биэрбиттэр. Вера Алексеевна улуустарыгар уолан ааҕыыларыгар кыттыбыт үс оҕо бу колледжка ситиһиилээхтик үөрэнэ сылдьарыттан үөрэр, киэн туттар.
* * *
Уоланнар ааҕыылара аан бастаан хоһоонньут, тылбаасчыт Иннокентий Артамоновка ананан, «Буойун суруйбут хоһоонноро» диэн ааттанан ыытыллыбыт. Иккиһэ Улуу кыайыыны уһансыбыт хоһооннорго анаммыт. Онтон бэйиэт Иннокентий Артамонов төрөөбүт Арыылааҕар күрэхтэһии тэриллибит. Улуу Кыайыы 70 сылыгар аналлаах куонкурус, үгэс курдук, өрө көтөҕүллүүлээхтик буолан ааспыт.