Анаабыр улууһун Сааскылааҕар “Тугутчаан” оҕо саада тэриллибитэ 60 сылын быйыл ахсынньы ыйга бэлиэтиэҕэ.
Сааскылаахтааҕы дьыссаат билигин 70 миэстэлээх, оҕолор манна үс бөлөҕүнэн дьарыктаналлар. Сэбиэдиссэй З.Н. Спиридонова иһитиннэрбитинэн, “Азия норуоттарын оонньуулара уонна оонньуурдара” диэн бырагырааманан эксперимеҥҥэ кытталлар. Ол чэрчитинэн дьоҕус мусуой тэрийбиттэр. «Ити үлэ түмүгүнэн быйыл сайын Тааттаҕа ыытыллыбыт педагогическай дьаарбаҥкаҕа ситиһиилээхтик кыттыбыппыт«, — диэн кэпсиир салайааччы.
Үбүлүөйдэрин көрсө араас тэрээһиннэр буолуохтара. Оҕолор, төрөппүттэр кэнсиэр бэлэмнииллэр. Истиэндэлэрин саҥардаллар, ахтыылары хомуйаллар.
“Тугутчааннар” өссө биир үөрүүлээх сонуннарынан саҥа оҕо саада тутулла турара буолар. Бу 98 миэстэлээх оҕо саадын дьиэтин көҥдөйө бүтэн, ис үлэтэ ыытылла турар. Саҥа дьиэҕэ эһиил киириэхтэрэ.
