Чурапчы нэһилиэгин “Удьуор” эр дьон түмсүүтүн салалтатынан “Эр Муус — 2016” муус ылыытыгар түөлбэлэр икки ардыларыгар күрэхтэһии тэрилиннэ.
Чурапчы нэһилиэгин иһинэн үлэлиир “Удьуор”эр дьон түмсүүтэ сыл аайы олус көхтөөх дьаһаллары, үлэлэри тэрийэрэ үгэскэ кубулуйда. Нэһилиэк баһылыга С.А. Саргыдаев быһаччы дьаһалынан ылыллыбыт муус барыта аҕа саастаах Чурапчы нэһилиэгин олохтоохторугар көмө быһыытынан тиэйилиннэ.
1-кы миэстэни ылбыт “Спортивнай” ТОС түөрт педагогическай үлэ бэтэрээнигэр, биир доруобуйа харыстабылын бэтэрээнигэр муус ылан киллэрдилэр, 2-с миэстэлээх “Куоҕалы” ТОС алта огдообо ийэҕэ тиэйдилэр, 3-с миэстэ буолбут “Молодежнай” ТОС түөрт элбэх оҕолоох ыалга көмөтүн анаата, 4-с миэстэлээх “Мурун Тыымпыйа” ТОС икки хоту көһөрүллүү кыттыылаахтарыгар, биир бастакы группалаах инбэлииккэ, икки үлэ бэтэрээнигэр, 5-с миэстэ буолбут “Центральнай” ТОС үс кырдьаҕас үлэ бэтэрээнигэр, биир инбэлиит соҕотох ийэҕэ, биир инбэлииккэ муустарын ылан, тиэйэн киллэрэн биэрдилэр. Барыта, уопсайа холбоон, 25 ыалга көмө оҥоһулунна.
Ити курдук Чурапчы нэһилиэгин эр дьонун түмсүүтэ күннээҕи түбүктэриттэн быыс булан, общественнай үлэҕэ көхтөөхтүк түмсэн үлэлииллэрэ сомоҕолоһууну, биир өйдөөх-санаалаах буолаларын көрдөрөр, атыттарга үтүө холобур буолаллар.