Горнайдар «Ийэ кыыһынаан» концертка кытыннылар

146

Дьокуускайга «Оҕо дыбарыаһын» киинигэр ийэлэр уонна кыргыттар холбоһуктаах «Кэрэ ситимэ» үҥкүү бөлөхтөрүн биир сыллаах үлэтин түмүктүүр дьоро киэһэтэ буолла. Онно Горнай улууһуттан кыттыыны ыллылар.


Санатан аастахха, «Кэрэ ситимэ» үҥкүү ансаамбыла Бүтүн Россиятааҕы «Россия ийэлэрэ» уопсастыбаннай хамсааһын иһинэн тэриллибитэ. Бырайыак ааптардарынан, салайааччыларынан биир дойдулаахтарбыт Виктория Контоева, Екатерина Романова буолаллар. Кинилэр: «Ийэ уонна кыыс бииргэ буоллахтарына, дьиэ кэргэн чөл туруктанарын бэйэлэрин холобурдарыгар көрдөрөллөр», — диэн санааларын үллэстэллэр.

img-20161211-wa0014Бу ансаамбыл биир сыллаах үлэтин түмүктүүр тэрээһинигэр барыта 94 ийэ уонна кыыс кытынна. Киэһэни «Саха» НКИК дириэктэрин солбуйааччы, «Саҥа күн» биэрии салайааччыта Михаил Сергеев уолунаан Владимирдыын иилээн-салайан ыыттылар. Бу хамсааһын чэрчитинэн, маннык таһымнаах үҥкүү бөлөхтөрө Дьокуускай 26, 2 №-дээх оскуолаларыгар, Сунтаарга, Хаҥаласка, Уус Алдаҥҥа, Горнай Маҕараһыгар, Бэрдьигэстээҕэр о.д.а. бааллар. Инникитин өссө элбэтэр баҕалаахтар.

Биһиги улуустан Маҕарас эбэлэрин, эдэр ийэлэрин, оҕолорун холбоһуктаах бөлөҕө (сал. О.В.Текеянова), Бэрдьигэстээхтэн «Кыыс хотун» ансаамбыл эдэр ийэлэрин уонна кыргыттарын холбоһуктаах ансаамбыла (сал. В.Н.Федорова) кытыннылар.

Ийэни уонна кыыс оҕону бииргэ холбуур, ситимниир ураты тэрээһиҥҥэ Бүтүн Россиятааҕы «Россия ийэлэрэ» уопрсастыбаннай хамсааһын Саха сиринээҕи бэрэссэдээтэлэ П.П.Борисова, бу түмсүү кыттыылааҕа, өрөспүүбүлүкэтээҕи «Билии» уопсастыба салайааччыта М.К.Петрова ыалдьыттаатылар.

ыыс оҕо барахсан ийэтин холобур оҥостон улаатарыгар, маннык кэрэҕэ уһуйар тэрээһиннэр сабыдыаллара олус улахан. Кыыс оҕо ийэтинээн биир дьарыгы өрө тутан улааттаҕына, кинилэр икки ардыларыгар куруук истиҥ сыһыан баар буолуоҕа.
Бырайыак ааптардара кэлэр өттүгэр ыал аҕа баһылыгын кытта, уолаттары түмэр санаалаахтарын эттилэр. Хас да улууска маннык хамсааһын тэриллибитэ үөрүүлээх.