Бэрдьигэстээх орто оскуолатыгар үөрэнээччилэр омук тылынан кэпсэтиилэрин сайыннараары, омук тылыгар интэриэстэрин көҕүлээри тэрээһин арааһа ыытыллар.
Оскуолабыт 2010 сылтан норуоттар икки ардыларынааҕы бырайыакка киирсэн Финляндия — Швеция — Норвегия дойдуларын кытта ыкса сибээстээһи тутуһар. Онон оскуолабыт үөрэнээччилэрэ сылын аайы бу дойдуларга сылдьан саха норуотун култууратын көрдөрөн, билиһиннэрэн кэлэллэр.
Ол курдук, сэтинньи 26-28 күннэригэр «Хотугу форум» бырагырааматын чэрчитинэн ыытыллыбыт Арктика Сэбиэтин семинарыгар биһиги оскуолабыт салалтата (дириэктэр Анжелика Гаврильева) баран көрсүһэн кэллэ. Дьокуускайдааҕы национальнай гимназияны кытта кыттыгас бырайыактарынан омук тылынан эссе суруйуутугар норуоттар икки ардыларынааҕы күрэс ыытыллыбыта. Онно өрөспүүбүлүкэ араас улуустарыттан барыта 72 үөрэнээччи кыттыыны ылбыт. Бу күрэс түмүгүнэн бастыҥ кыттааччылар «төгүрүк остуолга» Норвегия посолун Лейдульв Намтведы кытта көрүстүлэр уонна Хоту дойдулар инникитин хайдах сайдыахтарын туһунан кэпсэттилэр. «Төгүрүк остуолу» биһиги оскуолабыт омук тылыгар учуутала Туйаара Максимова иилээн-саҕалаан ыытта. Кыайыылаахтар бу күн наҕараадалары тутан үөрэн-көтөн, астынан, Норвегия посолун уонна посольствотын бэрэстэбиитэллэрин, университет ректорын Тромсо Анне Хусебегы кытта кэпсэтэн, кинилэр алгыстарын ылан, омук тылын салгыы үөрэтэргэ олук ууруллан тутум үрдээтилэр.
Иккис күн Хотугу форум аһыллыытын программатын чэрчитинэн биһиги оскуолабыт оҕолоро, омук тылын учууталлара Степанида Петровна Сидорова, Т.Е.Максимова, Наталья А Костромина ЭПЛ «Даймонд» компания тупсаҕай тутуулаах, киэҥ-куоҥ дьиэтигэр ыраахтан кэлбит ыалдьыты көрүстүлэр. Көрсүһүүнү сэттис «а» кылаас кыргыттара Амина Тырылгина уонна Юлия Спиридонова үс араас омук тылынан эҕэрдэлээн арыйдылар. Ол кэннэ Аина Колесова салайар «Арылхан» ансаамбылын оҕолоро үҥкүүлээн, Амина Тырылгина (VII «а») хомуска сахалыы матыыптары дьүрүһүтэн ыалдьыттар куттарын туттулар. Бу долгутуулаах күн оҕолор норуоттарын култууратын сиһилии билсиһиннэрэн улахан сэҥээриини ыллылар. Оскуолабыт дириэктэрэ Анджелика Альбертовна посол Лейдульв Намтведы, университет ректора Тромсо Анне Хусебегы, норуоттар икки ардыларынааҕы табаһыттар кииннэрин дириэктэрин эбээһинэһин толорооччу Андерс Оскалы кытта ирэ-хоро сэһэргэстилэр, тиһиктээхтик үлэлэһэргэ былааннаннылар.
Көрсүһүүгэ сылдьыбыт дьон бары улаханнык сэргэхсийдилэр, кэскиллээх кэпсэтии барбытыттан үөрдүлэр. Кырдьыга, маннык тэрээһиннэр ыытыллан норуоттар икки ардыларынааҕы сыһыан дириҥиир, атын омуктар култуураларын кытта билсиһэбит уонна бэйэ норуотун култууратын билиһиннэрэбит. Маныаха билиҥҥи үйэҕэ омук тылын билэргэ суол аһаҕас. Кылаабынайа кыһаныахха, үөрэтиэххэ эрэ наада. Онтон оннук кыах биһиэхэ барыбытыгар баар эбээт.
