Горнайга сквер уонна өйдөбүнньүк бэлиэ нэһилиэк киэн туттуутунан буоллулар

154

Горнай улууһун Бэрдьигэстээх бочуоттаах олохтоохторугар анаммыт сквер уонна улуус бочуоттаах олохтооҕор, «Үлэ Кыһыл Знамята», Октябрьскай Өрөбөлүүссүйэ орденнарын кавалерыгар, СӨ Норуот хаһаайыстыбатын үтүөлээх үлэһитигэр, биллиилээх ыанньыксыт Раиса Андрееваҕа анаммыт өйдөбүнньүк бэлиэ олохтоохтор киэн туттуулара буолар.


Бэрдьигэстээххэ Өйдөбүнньүк бэлиэни уонна сквери аһыы үөрүүлээх күнүгэр эҕэрдэ тылы улуус дьокутааттарын Сүбэтин бэрэссэдээтэлэ Алквиад Тарасов, Бэрдьигэстээх нэһилиэгин баһылыга Марк Парфенов, нэһилиэк бочуоттаах олохтоохторун ааттарыттан Евдокия Тарасова уонна да атыттар эттилэр. Улуус киэн туттар дьонугар сүгүрүйүү кэнчээри ыччакка үтүө холобур буоларын, сырдыкка-кэрэҕэ угуйа турарын бэлиэтээтилэр.

Солоҕон нэһилиэгин баһылыга Дмитрий Семенов биир дойдулаахтарыгар, бастыҥ ыанньыксыкка Раиса Андрееваҕа аналлаах бюст баар буолбутуттан улаханнык үөрэрин биллэрдэ. Раиса Петровна «Кэнчээри» ыччат комсомольскай пиэримэтигэр ыстаарсайдаабытын, настаабынньыктаабытын, эдэр ыччаты олох киэҥ аартыгар үктэннэрбит улахан үтүөлээҕин, үрүҥ илгэни үрүлүтүүгэ оройуоҥҥа бастакынан 2000-3000 кирбиини ылбытын киэн туттан бэлиэтээтэ.

«Долгутуулаах күн Раиса Петровна уола Петр Платонов, кыыһа Альбина Петрова ийэлэрин туһунан истиҥник ахтан-санаан аастылар, улуус уонна нэһилиэктэр салалталарыгар махтаннылар«, — диэн улуус дьаһалтатын испэсэлииһэ Айталина Санникова сырдатта.

Үөрүүлээх күн сылдьыбыт ыалдьыттар саҥа тутуулар тупсаҕай көстүүлээхтэрин, болҕомтону ыраахтан тардалларын бэлиэтээтилэр. Сквергэ көмүс буукубаларынан суруллубут бочуоттаах олохтоохтор испииһэктэрин болҕойон аахтылар, бюһу сөҕө-хайгыы көрдүлэр-иһиттилэр. Инникитин өйдөбүнньүк бэлиэлэри ыччат көрө-истэ, харыстыы, тупсара сылдьарыгар баҕа санааларын тириэртилэр.