Харбалаахха дьахталлар Сэбиэттэрэ үлэлээтэ

172

“Көрдьүгэн уотуттан улахан уот сириэдийэр”, “Кыымтан кутаа умайар” эбэтэр “Баҕа силэ байҕалга туһалаах”, “Тыыннаах киһи тыыппалаах,” — дииллэрин тумус оҥостон, “Общественнай тэрилтэлэр үлэлэрин сэргэхситэ” диэн соруктаах, нэһилиэнньэни көхтөөх, бэйэни-бэйэ салайынар урукку уоппуттарыгар көҕүлүүр сыаллаах тэрээһиҥҥэ кыттан, Харбалаах нэһилиэгэр тахсан, Тамалакаан, Харбалаах нэһилиэгин дьахталлара кыттыылаах олус туһалаах, сэргэх тэрээһиҥҥэ кыттан киирдим.


Урут маннык сырыылар нэһилиэнньэ кыаммат эбэтэр уйулҕа, сиэр-майгы өттүнэн көмөҕө наадыйар араҥатыгар улуус дьаһалтатын идэлээх үлэһиттэрин эбэтэр социальнай харысхал нөҥүө эрэ ыытыллар эбит буоллахтарына, бу сырыыга общественнай тэрилтэлэр сомоҕо күүстэрин туһанан, көмө уонна общественнай үлэ көҕүн өрө көтөҕөр көҕүлээһин быһыытынан саҕаланна. Бу тэрээһини улуустааҕы дьахталлар Сэбиэттэрин салайааччыта Пелагея Иванова быһаччы тэрийэн ыытта. Ол иһин быһыылаах, икки нэһилиэк дьахталларыттан атын ким да суох. Инники өттүгэр сүбэ быһыытынан араас общественнай хамсааһыннар салайааччылара бары кыттыһан, бастыҥ үлэ уопутун тарҕата, санаа, уопут атастаһа, көҕүлүү, маннык тэрээһиннэри тиһигин быспакка ыыталлара буоллар туһата бэрт элбэх буолуо этэ. Киһи киһиттэн үөрэнэр. Ол курдук, бу бастакы сырыыга барыта 10 буолан сырыттыбыт.

Пелагея Дмитриевна ааспыт саас дьахталлар сьезтэрэ туруорбут соруктарыгар олоҕуран, үлэни хайдах сүрүннээн ыытарын туһунан кэпсээтэ, дьахтар күүһэ көмүөл күүһүгэр тэҥнээҕин санатан туран, көхтөөх үлэҕэ ыҥырда. Дьиэ кэргэн кииннэрин тэрийии олох ирдэбилэ буоларын саната Ороһутааҕы К.С.Чиряев аатын сүгэр түмэл дириэктэрэ Раиса Васильева, норут үтүө үгэстэринэн оҕону иитии, дьиҥнээх саха буолар аналы бэйэ холобурунан көрдөрүү буоларын мин, норуот педагогикатын Ассоциациятын улуустааҕы салаатын салайааччыта, этиннибит. “Доруобуйа, доруобай олох” туһунан улуустааҕы киин балыыһа гинеколог бырааһа Людмила Долгунова бэсиэдэлээтэ. Улуустааҕы киин библиотека иһинэн тэриллибит түмсүүлэр, бөлөхтөр ситиһиилээх үлэлэрин түмүгэ уопсай үлэҕэ көмөтүн, ол быһыытынан Граннарга киирсэн, хотон, кырата суох үбү тэрилтэҕэ да киллэриниэххэ сөбүн туһунан Сардана Прокопьева сэһэргээн интэриэһи тарта. Хаалыктаах хаамыы туһатын, көмөтүн туһунан бэйэтин бөлөҕүн уопутун кэпсээн сэҥээриини “Билиилээх” түөлбэ аатыттан Светлана Иванова ылла. Уйулҕа үөрэҕин туһатын араас трениннэр көмөлөрүнэн логопед-психолог Харитина Валерьевна итэҕэтэ тириэртэ. Хайа дьахтар кэрэ буолуон баҕарбатай? Алена Ким олус имигэстик, сатабыллахтык биир кыттыылааҕы сирэйин, баттаҕын оҥорон, тупсаран кэбиспитэ барыбытын сөхтөрдө. Салгыы тарбахтарыгар талааннаах, сатабыллаах илиилээх, кэрэни үксэтэр И.Г.Павлова, Н.Н.Салашина ыыппыт, аныгылыы ааттаатахха, маастар-кылаастара улахан сэҥээриини ылла. Бу ааҕыллыбыт хаһыатынан, хаалбыт кумааҕынан кэрэчээн сибэкки уурар иһиттэн саҕалаан араас кээмэйдээх ураты кэрэ дьикти тэриллэри оҥорор кыргыттары үтүктэн, бэлиэр биир кыыс ваза оҥорон саҕалаан хаалла.

Ити курдук, төһө да өрөбүл күн буоллар, икки өттүттэн астынан, элбэҕи билэн, саҥа санаа кыымын саҕан, үлэни саҥалыы тэрийэн, улууспут сайдыытыгар сонун, саҥа сайдыы суолун киллэрэр, материальнай базаны хаҥатардыы, Манчаары оонньууларын чиэстээхтик көрсөн, кэнчээри ыччакка чөл, кэрэ олоҕу кэрэһэлииргэ бигэ тирэх ылынан үлэлиэҕиҥ-хамсыаҕыҥ! Үөһээ Бүлүүбүт — төрүт дойдубут чэчирии сайдарыгар бары кыһаныаҕыҥ. Норуот күүһэ – көмүөл күүһэ.

«Үөһээ Бүлүү» хаһыат