Эдьигээн улууһугар, Кыстатыамҥа, дьахталлар Сэбиэттэрэ «Нулгин» ЭКК саалатыгар эйэҕэс эбээлэри, истиҥ ийэлэри «Ийэҕэ махтал» диэн сынньалаҥ киэһэҕэ түмтэ. Дьоро күн «Туйаара» оҕо саада, оскуола, балыыhа, олохтоох дьаһалта кэллэктииптэрэ, эбээлэр түмсүүлэрэ, предпринимателлэр атах тэпсэн олорон үүттээх сылаас чэй иһэ-иһэ дуоһуйа кэпсэттилэр, ыллаатылар, араас куонкурустарга кытыннылар.
Долгутуулаах тэрээһин «Ийэҕэ махтал» ырыанан саҕаланна. Салгыы ийэлэрин сылаастык ахтан-санаан аһарыы кэнниттэн, «Бу кимий?» диэн хаартысканан таайбаран оонньуу болҕомтону тарта. Онтон «Сайыҥҥы дьарыкпыт» диэн фотогалереяҕа нэhилиэк далбар хотуттара саас хатыҥ уутун ылыыттан саҕалаан, кэргэннэрин кытта бултууллара, балыктыыллара, дьиэ кэргэнинэн сир астыыллара, оҕуруот арааһын олордоллоро, сибэкки сиэдэрэйин үүннэрэллэрэ көрдөрүллэн хардарыта сөҕүү, үөрүү-көтүү бөҕө буолла. Бэртээхэй биэчэри караокеҕа ыллаан күрэхтэһии өссө киэргэттэ.
Долгутуулаах түгэнинэн, нэһилиэккэ тупсарыныы сылынан ыытыллыбыт «Мин тиэргэним» куонкурус кыайыылаахтарын эҕэрдэлээһин буолла. «Бастыҥ сибэкки олордооччу» анал аатын С.Сергеева, «Бастыҥ холонооччу» — М.Григорьева, «Бастыҥ хаhаайка» — О.Устинова, «Талааннаах бастыҥа» — А.Платонова, «Бастыҥ оҕуруотчут» — В.Корякина ылан сэмэй бэлэхтэри туттулар. Тэрээһинтэн олохтоохтор улаханнык астыннылар, сэргэхсийдилэр. Дьахталлар Сэбиэттэрин үлэтигэр элбэх баҕа санааларын тиэртилэр. Онтон биһиги, түгэнинэн туһанан, тэрээһиммитигэр куруук өйөбүл буолар дьоммутугар: ИП Т.Ермолаеваҕа, И.Процюкка, А.Харитоновка, «Надежда» гостинай двор кэллэктиибигэр, «Хоту» маҕаhыын салалтатыгар И.Константиновка махтанабыт.