Хотугу дойду олохтоохторун сүрүн аһылыктара — эт уонна балык. Бу боппуруос олохтоохторго бэрт табыгастаахтык быһаарыллан, дьон-сэргэ сүргэтэ өрө көтөҕүллэн сылдьар. Ол курдук, 2015 сылтан саҕалаан оройуоҥҥа эргиэн ырыынагар олохтоох бородууксуйаны соҕотуопкалаан нэһилиэнньэни хааччыйыыга, биллэр-көстөр миэстэни Никон Николаев салайааччылаах «Оленек-торг» муниципальнай тэрилтэ ылар буолла.
Бу сылларга «Оленек-торг» МУТ булуустаах хаһаайыстыбатын уонна рефрижераторын сөптөөхтүк дьаһанан, оҥостон, сылы быһа аһы-үөлү соҕотуопкалаан, нэһилиэнньэни хааччыйан үөрдэр буолла.
Быйылгы дьылга кыыл таба хамсааһына Өлөөн оройуонуттан төһө да кый ыраах Ньурба, Бүлүү, Мииринэй оройуоннарын сирдэринэн-уоттарынан бардар, «Оленек-торг» МУТ соторутааҕыта Мииринэй – Өлөөн оройуоннарын кыраныыссатыгар общиналарынан 100-чэ төбө кыыл таба этин соҕотуопкалаан аҕалла. Итиэннэ Өлөөн сэлиэнньэтигэр атыыга таһаарда. Манна даҕатан эттэххэ, ахсынньы аам-даам тымныытын аахсыбакка, Өлөөнтөн 960 км. сири биир «КАМАЗ» массыынанан «Оленек-торг» дириэктэрэ Никон Николаев, суоппардар Н.Аммосов, Н.Аммосов тохтоло суох айаннааннар, соҕотуопкаламмыт эти тиэйэн аҕаллылар. Бу эти «Оленек-торг» МУТ үлэһиттэрэ бэрт кичэллээхтик уонна түргэнник-тарҕаннык эрбэтэн, анал пакеттарга уган атыыга таһаардылар.
«Сардаҥа» хаһыат редакцията Никон Николаевы көрсөн сэһэргэстэ.
– Нэһилиэнньэни сылы эргиччи олохтоох аһынан-үөлүнэн хааччыйарга соруктанан үлэлиибит. 2017 сылга дьоҕус бородууксуйаны астыыр-үөллүүр сыах арыйар былааннаахпыт. Сотору Анаабыртан балык аҕалыахпыт. Онон нэһилиэкпит дьоно-сэргэтэ Саҥа дьыллааҕы остуолугар балыктаах буоларын хааччыйыахпыт диэн эрэллээхпин, — диэн эттэ.