Орто Халымаҕа «Спектр» оҕо-ыччат сайдар Киинигэр түөрт саҥа куруһуок аһылынна. Куруһуоктар оҕолорго эрэ буолбакка, улахан дьоҥҥо, чуолаан ийэлэргэ эмиэ ананаллар.
Саҥа арыллыбыт «Мастерица» куруһуокка иис араас көрүҥэр үөрэтэллэр. Оттон «Эдэр ийэлэр кулууптарыгар» ийэлэр тэтимнээх аныгы үҥкүү көмөтүнэн эттэрин-сииннэрин эрчийэллэр, пластикаҕа, имигэс буолууга үөрэтэллэр.
Алын кылаас үөрэнээччилэригэр «Инфознайка» куруһуок үлэлиир. Тус-туһунан тиэмэлээх дьарыктар ыытыллаллар. Холобур, 1-кы уонна 2-с кылаас оҕолоругар — «Я художник», 3-с кылаастарга — «Я учусь печатать», оттон 4-с кылаас үөрэнээччилэрэ «Мастер слайдов» дьарыкка слайда оҥорорго уһуйуллаллар.
Үрдүкү кылаас оҕолоругар «Ровесник» байыаннай-патриотическай хайысхалаах кулууп тэрилиннэ. Каникул кэмигэр «Хорош в строю — силён в бою» биэс күннээх үөрэх ыытылла турар. Манна оҕолор эппиэтинэстээх, чөл олохтоох буоларга уонна байыаннай маастарыстыбаҕа үөрэнэллэр. Итини сэргэ баһаарынай чаас, Орто Халыматааҕы ИДьМ отделениетын үлэһиттэрэ кэлэн, бэйэлэрин идэлэрин туһунан кэпсииллэр. Биэс күннээх үөрэҕи түмүктүүр күҥҥэ «Колымский патриот» тематическай киэһэҕэ уһуйуллааччылар аармыйа кэккэтигэр сулууспалаабыт, Чечняҕа бойобуой кыргыһыыга кыттыбыт дьону кытары көрсүөхтэрэ.