Ардай аһыылаахтар таба иитиитинэн дьарыктанар хаһаайыстыбаларга улахан хоромньулаахтар. Томпоҕо уон ый иһигэр бөрөлөр 648 табаны тартылар, ол иһигэр «Томпо» ТХПК (фактория) 591 табаны, П.Е. Погодаев аатынан родовой общинаҕа 53 табаны уонна М.С. Лебедев аатынан родовой общинаҕа түөрт табаны тардыбыттар.
Бөрөнү бултааһын тиһиктээх, сыралаах үлэни, сэрэхтээх буолууну эрэйэр. Сыралаһыы түмүгүнэн быйыл оройуон үрдүнэн 42 адьырҕаны сууһарбыттара. Маныаха СӨ Айылҕа харыстабылын министиэристибэтэ бөрөнү бултаһыыга анаан үп көрбүтэ улахан тирэх буолар. Онтон Томпотооҕу айылҕа харыстабылын инспекцията уонна Томпо оройуонун баһылыга Евгений Герасимов 2016-2017 сс. бөрөнү бултааһын тэрээһиннэригэр кыттыгас былааннаах үлэни тэрийэллэр. «Томпо» ТХПК (ф.) дириэктэрэ Николай Лебедев уонна ТХУ начаалынньыга Егор Андросов Өймөкөөн оройуонун Томтор нэһилиэгин кытта булт дуогабарын түһэрсибиттэрэ. Өймөкөөн, Томпо оройуоннарыгар 20 чаас үөһэттэн сылдьан бөрөнү бултааһын көрүллүбүтэ. Балары сэргэ, ыстаадалары кытта рациянан сибээс олохтонно. Онон табаһыттар сирдэригэр-уоттарыгар бөрө киирбитин туһунан биллэрдилэр да, РФ ДОСААФ өрөспүүбүлүкэтээҕи филиалыттан вертолет көтүөҕэ.
Билиҥҥи туругунан ыстаадалар тастарыгар 40-ча бөрө сылдьар. Онтон өрүс нөҥүө сытар Ыҥаа нэһилиэгин сиригэр аҕыс адьырҕа баара чопчуланна.