Тумулга Улуу Кыайыыны уһансыбыттарга аналлаах тэрээһин буолла

206

Уус Алдан улууһун Тумулугар «Память» диэн ааттаах 1941 сыл сэтинньи 7 күнүгэр Москваҕа ыытыллыбыт байыаннай Парад 75 сылыгар аналлаах тэрээһин ыытылынна. Тиит Арыы сүрүн оскуолатын «Ястреб» хамаандата кытынна.  Олохтоотор икки хамаанданы туруордулар.


Сарсыардаттан Бороҕон нэһилиэгиттэн сэриигэ кыттыбыт буойуннар пааматынньыктарыгар миитин буолла. Эдэр армеецтар өйдөбүл грильяндатын уурдулар. Мустубут дьону нэһилиэк солбуйар баһылыга, Россия Геройа М.М. Стрекаловскай сиэнэ А.И. Стрекаловскай, Тиит Арыы оскуолатын иитэр үлэҕэ директоры солбуйааччы Т.А. Аргунова эҕэрдэлээтилэр. Миитин кыттыылаахтара 1941 сыллааҕы форманан таҥныбыт эдэр армеецтары дохсун ытыс тыаһынан көрүстүлэр.

Салгыы тэрээһин И.А.Халдеев аатынан спортивнай саалаҕа салҕанна. Россия, Саха сирин государственнай былаахтарын сэргэ, Бороҕон нэһилиэгин ветераннарын улуу Кыайыы 25 сылыгар анаан оҥоһуллубут Кэриэс Знамяларын күөрэччи көтөҕөн Тумул оскуолатын знаменнаҋ бөлөҕө киирбитин, мустубут дьон сүһүөхтэригэр туран көрүстүлэр. Ыалдьыттары, тэрээһин кыттыылаахтарын оскуола директора Ф.В. Десяткина, нэһилиэк дьаһалтатын аатыттан Стрекаловскай А.И. эҕэрдэлээтилэр.

Мустубут дьону оскуола алын кылааһын үөрэнээччилэрэ ырыанан эҕэрдэлээтилэр. Нэһилиэк кырдьаҕастарын «Аал уот» түмсүүтүн, ветеран учууталлар ааттарыттан Л.П.Попова тыл эттэ уонна Москва сэриитин кыттыылааҕа, партизанка Зоя Космодемьянская туһунан М. Алигер «Зоя» поэматын уус ураннык ааҕан иһитиннэрдэ.

Үөрүүлээх чаас кэнниттэн эдэр педагог, Тумул орто оскуолатын историяҕа учуутала Е.Д. Петров  Герой куорат Москва аннынааҕы кыргыһыы туһунан оҕолорго кэпсээтэ. Бу кэнниттэн эдэр армеецтар «Москваны көмүскээбиттэрэ» темаҕа дакылааттарын көмүскээтилэр.

Эбиэт кэнниттэн тэрээһин кыттыылаахтара нэһилиэк историятын сэһэргиир музейга ыалдьыттаатылар. Оттон оҕолор «Өйдөбүнньүк» байыаннай спортивнай көрүҥнэргэ курэхтэстилэр. Ол курдук автоматы ыһарга-таҥарга, хамаанданан уонна биирдиилээн илин-кэлин түһүстүлэр. Салгыы хамаандаттан иккилии киһи ОЗК, баһаарынайдар көстүүмнэрин кэтиигэ, перекладинаҕа, медико-санитарнай бэлэмҥэ, сыал ытыыга эрбии курдук эристилэр, эстафета ыытылынна.

Күрэхтэһии түмүгүнэн Тумул 1 хамаандата бастакы миэстэ, Тумул 2-с хамаандата 2, Тиит Арыы оскуолата 3 миэстэни ыллылар. Сэрии ветераннарын » Өйдөбүнньүк» түмсүүтэ туруорбут бириистэринэн, грамоталарынан, кубогынан бэлиэтэннилэр.

Оскуола үөрэнээччилэрин холбоһугун президенэ Лилиана Петухова харда тыл эттэ. Маннык тэрээһин наадалааҕын, оҕолору интэриэһиргэтэрин эттэ, тэрийээччилэргэ махтанна.