Үөрүү-көтүү доҕуһуолланан, биир дойдулаахтарын алгыстарынан кынаттанан “Абыйаан” саҥа ырыа бөлөҕө Абый улууһун Муҥурдаах нэһилиэгэр кэлэн ыллаан-туойан барда. Олохтоохтор уолаттарыгар “ыалдьаллара” харахха тута быраҕылынна. Эстрада да сулустара кэллэхтэринэ сылдьыбат элбэх көрөөччү сырытта, дьон-сэргэ сэҥээрдэ. Ол, арааһа, ырыаһыттар бары Сыаҥааннаахтан силистээхтэрин истэн, билиэн-көрүөн баҕалаах ордук элбээбит буолуохтаах.
Салайааччылара – Николай Аммосов,”Тыыннаах доҕуһуол” бырайыак ааптара, убайдыы бырааттыы Леонид, Юрий Новиковтар, Петр Черемкин, Владимир Дохунаев Белай Гора араас тэрилтэлэригэр үлэлииллэр.
Уол оҕо барахсан сырдыкка-кэрэҕэ тардыһан, дьонун-сэргэтин ааттатан, ыллыы-туойа, үөрэ-көтө сылдьарын көрөртөн ордук улахан үөрүү туох баар буолуой! Холобур, Николай манна сыанаҕа ыллаабытын истибэтэх ыраатта. Оттон бу киэһэ, кыра эрдэҕинэ тулаайах кэриэтэ хаалбыт уол, улахан эдьиийигэр Катяҕа, кэргэнигэр анаан ыллаабыт ырыаларын дьон бары олус долгуйа, уйадыйа иһиттэ. Онно эбии кини уолаттары түмэн, иилээн-саҕалаан таһааран эрэриттэн эмиэ үөрдүбүт.
Абый Абыйа Владимир, хааһахтан хостоон эрэрдии саҥаран-иҥэрэн, бэйэтин төрүттэрин, дьонун санатан, хамсанан-имсэнэн кырдьык да артыыс ааттааҕа эбит. Кэнсиэри ыччат отделын салайар Марианна Жиркова иилээн-саҕалаан ыытта. Киирии билиэттэринэн лотерея оонньонно.
“Абыйааннар” маҥнайгы гастроллара табылынна. Салгыы Абыйга кэнсиэрдиэхтэрэ. Уолаттар кэнсиэрдэрин салайан ыыппыт Марианна Жирковаҕа, суоппар Павел Черемкиҥҥа, спонсордаабыт “Хотугу Кыым” редакция кэллэктиибигэр, бары көрөөччүлэригэр истиҥ махталларын тиэртилэр.
Инникитин өссө сайдан, нэһилиэктэрин, улуустарын ааттатыахтара, ырыаларынан-тойуктарынан эрэ буолбакка, үлэлэринэн-хамнастарынан, тутта-хапта сылдьыыларынан атыттарга холобур буолуохтара диэн эрэнэбит. Өссө да кэлиэхтэрэ диэн күүтэ хаалабыт.